நீங்கள் இறைவனுக்கு அர்ப்பணிக்க வேண்டியது செடிகளில் விளைந்த மலர்களை அல்ல; அது செடிகளுக்குத் தான் பயன் தருமே அன்றி உங்களுக்கு அல்ல! இறைவன், உங்கள் இதயத்தடாகத்தில் மலர்ந்த தாமரையையும், உங்கள் உலகவாழ்க்கை எனும் மரத்தில் பழுத்த கனியையும் விரும்புகிறானே தவிர, கடைவீதியில் கிடைக்கும் தாமரையையும் கனியையும் அல்ல! ‘’நாங்கள் இறைவனை எங்கே காண முடியும்’’ என்று நீங்கள் கேட்கலாம். நல்லது, இறைவன் தனது முகவரியை, பகவத்கீதையின் 18வது அத்தியாயத்தின் 61வது ஸ்லோகத்தில் அளித்துள்ளான். அதைப் பார்த்துக் குறித்துக் கொள்ளுங்கள். ஈஸ்வர ஸர்வ பூதானாம் ஹ்ருத்தேசே – “ஓ அர்ஜுனா! இறைவன் அனைத்து உயிரினங்களின் இதயங்களில் வசிக்கிறான்.” இப்போது, இதை அறிந்த பிறகு, நீங்கள் எவ்வாறு எந்த உயிரினத்தையும் கீழ்மைப்படுத்தி அவமதிக்கவோ அல்லது அவர்களை வெறுப்பதில் களிப்படையவோ அல்லது எள்ளி நகையாடவோ முடியும்? ஒவ்வொருவரும் தெய்வ சான்னித்யத்தால் உயிரூட்டப்பட்டு தெய்வீக குணங்களால் செயல்படுகிறார்கள். ப்ரேமை, நன்மதிப்பு, நட்புணர்வு, ஆகியவற்றையே உங்களிடமிருந்து ஒவ்வொருவரும் பெற வேண்டும். இவற்றை முழுமையாக அளியுங்கள். (தெய்வீக அருளுரை, ஏப்ரல் 16, 1964)