சத்தியத்தை அறிந்து கொள்ளுங்கள்; ‘சத்தியம்’ உங்களுக்கு வலுவூட்டி, அனைவருடனும் உறவை வளர்த்து, காம க்ரோதத்தின் பிணைப்பிலிருந்து உங்களை விடுவிக்கும். ‘சிவம்’ என்பதிலுள்ள பாடத்தைக் கற்றுக்கொள்ளுங்கள்: கோபம் மற்றும் பேராசை என்ற விஷத்தை விழுங்கி, உலகுக்குத் தீங்கிழைக்கும் அதன் முயற்சியில் அதைச் செயலற்றதாக்குங்கள். சொல்லாலும் செயலாலும் ஆறுதலையும் ஆதரவையும் அளியுங்கள். சிவன் தனது ஜடாமுடியில் பிறையைச் சூடியுள்ளான்; இதன் இதமான நிலவொளி பக்தன் இறைவனை நோக்கி செல்லும் பாதைக்கு ஒளியூட்டுகிறது; மேலும் இப்பயணத்தின் சிரமத்தையும் குறைக்கிறது. சிவன், சாந்தி சந்தோஷங்களைப் பரப்புகிறான். ஆனால், நீலகண்டனாய் தனது தொண்டையில் மிகக்கொடிய ஆலஹால விஷத்தை மறைத்து வைத்துள்ளான். சமூக விரோதமான, நச்சுத்தனமான வெறுப்புகள் மற்றும் போட்டி பேராசை போன்ற குணங்களையும் போக்குகளையும் நீங்கள் உங்களுக்குள் கட்டுப்படுத்தி வைத்துக் கொள்ள வேண்டும் என்பதே இதன் பாடமாகும். சிவம் என்பது குறிப்பிட்ட கடவுளையோ அல்லது மும்மூர்த்திகளையோ குறிப்பதல்ல. அது அனைத்து மனிதகுலத்தையும் உள்ளடக்கியது, ஏனெனில் ‘தானே சிவம்’ என்பதை மனிதன் உணர வேண்டும். தவிர, சத்தியமே அழகு, அந்த அழகே தெய்வம் என்பதை ‘சுந்தரம்’ நினைவூட்டுகிறது. இங்கு அழகு என்றால் உடலழகல்ல; ஒழுக்கம் மற்றும் ஆன்மிக அழகாகும். வெறுக்கத்தக்க எண்ணங்கள், விரும்பத்தகாத பேச்சு, அருவருக்கத்தக்க செயல்கள் ஆகியவற்றை விடுத்து, இந்த சுந்தரத்தின் இலட்சியத்தை உங்கள் மனதில் எப்போதும் புதிதாய் கொண்டிருங்கள்! (தெய்வீக அருளுரை, அக்டோபர் 25, 1972)