அறியாமை என்னும் மேகம் சத்தியத்தை மறைக்கிறது. இறைவன், சத்தியத்தை வெளிப்படுத்துவதற்கு முனிவர்கள், துறவிகள் மற்றும் தீர்க்கதரிசிகளை அனுப்புகிறான்; மேலும் மனிதனுக்கு விழிப்புணர்வூட்டி கடைத்தேற்றுவதற்காக ஓர் அவதாரமாக அவனே தோன்றுகிறான். இரண்டாயிரம் ஆண்டுகளுக்கு முன்பு, குறுகிய நோக்கமுடைய அகங்காரமும் அடர்ந்த அறியாமையும் மனித குலத்தை மாசுபடுத்தியபோது, இயேசு, ப்ரேமை மற்றும் இரக்கத்தின் திருவுருவமாக அவதரித்து, வாழ்வின் உயர்ந்த இலட்சியங்களைக் கொண்டு மனிதர்களிடையே வாழ்ந்தார். அவரது வாழ்க்கையின் பல்வேறு கட்டங்களில் அவர் எடுத்துரைத்த பாடங்களில் நீங்கள் கவனம் செலுத்த வேண்டும். முதலில், 'நான் தேவனின் தூதன்' என்று அவர் அறிவித்தார். ஆம். ஒவ்வொரு தனிமனிதனும் அந்தப் பாத்திரத்தை ஏற்று, தெய்வீக ப்ரேமைக்கும் தொண்டுக்கும் எடுத்துக்காட்டாக வாழ வேண்டும். இன்றைய தினம் கிறிஸ்துமஸாகக் கொண்டாடப்படுகிறது. அவர் பகர்ந்த வார்த்தைகள், கொடுத்த அறிவுரைகள், விடுத்த எச்சரிக்கை ஆகியவற்றை நினைவு கூர்ந்து, அவர் வகுத்த பாதையில் உங்கள் அன்றாட வாழ்க்கையை நடத்த முடிவு செய்யுங்கள். அவருடைய வார்த்தைகளை உங்கள் இதயங்களில் பதிய வைத்துக் கொண்டு, அவர் போதித்தவை அனைத்தையும் கடைப்பிடிக்க வேண்டுமென நீங்கள் உறுதி எடுத்துக் கொள்ள வேண்டும். (தெய்வீக அருளுரை, டிசம்பர் 24, 1980)