மனிதனுடைய இதயத்தில் ப்ரேமையையும் இரக்கத்தையும் விதைப்பதற்காக இயேசு தன் இரத்தத்தைச் சிந்தி, இன்னுயிரைத் தியாகம் செய்தார்; அதன் மூலம், மனிதன் பிறர் மகிழ்ச்சியாக இருக்கும்போது மகிழ்ச்சியடையவும், பிறர் துக்கத்தில் இருக்கும்போது அவர்களின் துக்கத்தை உணர வேண்டும் என்பதற்காகவும் இவ்வாறு செய்தார். நீங்கள் கிறிஸ்துமஸ் தினத்தை வெறும் பண்டிகையாக கேளிக்கைக்காகக் கொண்டாடக் கூடாது. மாறாக, அவர் போதித்த இலட்சியங்களில் ஒன்றையாவது கடைப்பிடிப்பது என உறுதி எடுத்துக்கொள்வதன் மூலமாகவோ அல்லது அவர் மனிதனுக்கு முன் வைத்த இலக்குகளில் ஒன்றையாவது அடையப் பாடுபடுவதன் மூலமாகவோ கொண்டாடுங்கள். இந்தப் புனித நாளின் நினைவாக, உங்கள் மனதில் இருந்து தற்புகழ்ச்சி, அவதூறு பேசுதல் ஆகிய இரு தீமைகளை அகற்றுமாறு நான் உங்களை அழைக்கிறேன். மேலும், துன்பப்படுபவர்களுக்கு அன்பான சேவை செய்வது எனும் பழக்கத்தையும் ஏற்படுத்திக்கொள்ளுங்கள். நீங்கள் உங்களுடைய முழு நேரத்தையும், சக்தியையும் உலக சுகத்திலும் புலனின்பத்திலும் கழித்தால், உங்கள் மனிதப் பிறவிக்கே அவமானகரமானது. வாழ்க்கை என்பது வெறுமனே உண்டு கழிப்பதற்கு அல்ல; உணவு என்பது வாழ்வதற்கான ஒரு தேவை மட்டுமே. நீங்கள் இந்த தேகத்தை உங்களுடைய வசிப்பிடமாகக் கருதுகிறீர்கள்; இல்லை, தேகமே தேவாலயமாகும். இறைவன் அதில் உறைகிறான். இரக்கத்தையும் ப்ரேமையையும் வளர்த்துக்கொள்வதன் மூலம் அதைத் தூய்மையாகவும், புதிதாகவும், மணம் நிறைந்ததாகவும் வைத்திருங்கள். (தெய்வீக அருளுரை, டிசம்பர் 25, 1976)