இறைவனது தெய்வீகத் திருநாமத்தின் சக்திக்கு ஈடு இணையே இல்லை. மக்கள் பெரும்பாலும் அதை சாதாரணமாக எடுத்துக் கொள்கிறார்கள். அது தவறு. பளபளக்கும் கண்ணாடித் துண்டை தவறாக வைரம் என ஒருவர் கருதக் கூடாது. உண்மையான வைரம் முற்றிலும் வேறுபட்டது. அந்த வைரம் - DIAMOND என்பது எது? ‘DIE MIND’ - அதாவது மனம் அழிவதே. இறைவனது திருநாமமே உண்மையான வைரம் ஆகும். எனவே, அதைப் பத்திரமாகவும் பாதுகாப்பாகவும் வைத்துக் கொள்ளுங்கள். துன்பங்கள் - துயரங்கள், இழப்புகள் - இன்னல்கள் ஆகியவற்றால் ஒருபோதும் கவலை கொள்ளாதீர்கள். அவை வரும், போகும். அது உங்களுடைய உண்மையான இயல்பு அல்ல. உங்களுடைய உள்ளுறையும் ஆத்மா வலிமையானது, நிரந்தரமானது, சத்தியமானது. உங்களுடைய நித்ய, சத்திய இயல்பை விட்டுவிட்டு, தாற்காலிகமான, அசத்தியமான அலைகளை நீங்கள் பின்பற்றக்கூடாது. துரதிருஷ்டவசமாக, இன்று மக்கள் அசத்தியமான, கலைந்து செல்லும் அலைகளையே பின்பற்றிக்கொண்டு இருக்கிறார்கள். இப்படிப்பட்ட தாற்காலிகமான, அசத்தியமான அலைகளைப் பற்றிக்கொண்டு இருந்தால், நீங்கள் எப்போதும் ஏமாற்றப்பட்டுக் கொண்டே இருப்பீர்கள்! நீங்கள் இறைவனின் திருப்பாத கமலங்களில் தஞ்சம் புகுந்தவுடன், அதை விட்டு ஒருபோதும் விலகக் கூடாது. நீங்கள் எங்கு சென்றாலும் இறைவனது திருப்பாதங்கள் உங்களைக் காக்கும்! இறைவனது திருநாமத்தை இதயத்தில் உறுதியாகப் பிரதிஷ்டை செய்துவிட்டால் உங்கள் வாழ்க்கை புனிதமாகி விடும். அதுவே பக்தி. அதுவே உங்களின் சக்தி. அதுவே முக்தியும் கூட. (தெய்வீக அருளுரை, நவம்பர் 13, 2007)