தியானத்தின் பாதையில் கடினமான தடைகளாக விளங்கும் கோபம், தற்பெருமை, கர்வம், மற்றவர்களின் தவறுகளைக் கண்டறியும் போக்கு, கபட புத்தி போன்றவற்றை நீங்கள் தவிர்க்க வேண்டும். கடலின் ஆழத்தில் உள்ள நீரோட்டங்களைப் போல ஆழ்மனதிலும் கூட இவை இயங்குகின்றன. ஆன்மிக சாதகர்கள் சின்னஞ்சிறு விஷயங்களில் கூட கோபப்படாமல் இருப்பதில் கவனமுடன் இருக்க வேண்டும், ஏனெனில் அது அவர்களுடைய தியானத்தின் முன்னேற்றத்தைத் தடுக்கும். அனைவரிடத்தும் ப்ரேம பாவத்தையும், இனிமையான நடத்தையையும் வளர்த்துக் கொள்ள வேண்டும். பின்னர், விரும்பத்தகாத பழக்கவழக்கங்கள் விலகிவிடும், ஏனென்றால் எல்லா தவறான நடத்தைக்கும் கோபம்தான் மூலகாரணமாகும். கோபம் எந்த நபரையும், எந்த நேரத்திலும், எந்த விதத்திலாவது கெட்ட வழிகளில் ஈடுபடத் தூண்டிவிடும். எனவே, முறையான முயற்சியின் மூலம் முதலில் அதைப் பக்குவமாக அகற்ற வேண்டும். ஆன்மிக சாதகர்கள், தங்களுடைய குறைகளை யார் சுட்டிக்காட்டினாலும் அதை மகிழ்ச்சியுடன் வரவேற்க வேண்டும்; உண்மையில், அவற்றைச் சுட்டிக்காட்டுபவர்களுக்கு நன்றியுள்ளவர்களாக இருக்க வேண்டும். (தியான வாஹினி, அத்தியாயம்-14)