மனமே வாசனையை (நறுமணமோ அல்லது துர்நாற்றமோ)) கொண்டு வரும் காற்று. மனம், துர்நாற்றத்தின் பக்கம் திரும்பினால் அது உங்களை அருவருப்படையச் செய்கிறது; அது நறுமணத்தின் பக்கம் திரும்பினால் நீங்கள் மகிழ்ச்சி அடைகிறீர்கள். காற்று நாலாபக்கங்களிலும் இருந்து மேகங்களைத் திரட்டி வருகிறது; அதைப் போலவே, உங்களுடைய மனமும் பல எதிர்பார்ப்புக்களின் ஏமாற்றங்களை உங்கள் உள்ளுணர்வுக்குள் கொண்டு வருகிறது. உங்களுடைய அதே மனம்தான் காற்றைப்போல, தன்னை இருளில் மூழ்கடிக்கும் மேகங்களைக் கலைக்கவும் செய்கிறது அல்லது சந்தேகம் எனும் காரிருளில் உங்களை காணாமல் போகவும் செய்கிறது. மனதைக் கட்டுப்படுத்தி, நீங்கள் நிலைகுலையாது இருங்கள். இதுவே சாந்தியைப் பெறுவதற்கான ரகசியம்; இந்தக் கல்வியைத்தான் ஒருவர் முதன்முதலில் உரிமை கொண்டாடிப் பெறவேண்டும். இன்று மெத்தப் படித்தவர்தான் மிகுந்த அதிருப்தியோடும், மகிழ்ச்சியற்றும் இருக்கிறார் என்பதை நாம் காண்கிறோம். அப்படியானால், புத்தகங்கள், மனிதர்கள், பொருட்கள் ஆகிய எல்லாவற்றிலிருந்தும் அவர் கற்ற கல்வியினால் பெற்ற லாபம்தான் என்ன? இந்த சமச்சீரான மனப்பாங்கினைப் பெறுவதற்கு, நீங்கள் படித்தால் மட்டும் போதாது, முறையான ஆன்மிக சாதனை செய்ய வேண்டும். பின்னர், நீங்கள் ஏழையாகவோ பணக்காரராகவோ, போற்றப்பட்டாலோ தூற்றப்பட்டாலோ, அதிருஷ்டசாலியாகவோ துரதிருஷ்டசாலியாகவோ, எப்படி இருந்தாலும் மகிழ்ச்சியாக இருக்க முடியும். (தெய்வீக அருளுரை, டிசம்பர் 20, 1958)