உங்களது தேவைகளை, ஒரு குறைந்தபட்ச அளவிற்குக் குறைத்துக் கொள்ளுங்கள்; வானொலியை எப்போதும் வைத்திருந்து கிளர்ச்சியூட்டும் நிகழ்ச்சிகளை கேட்கத் தூண்டும் உந்துதல்களுக்கு இடமளிக்காதீர்கள். உங்களது அறை, மேஜை, ஆடைகள் வைக்கும் அலமாரி போன்றவற்றை ஆய்வு செய்து, அவசியமற்ற பொருட்களை எவ்வளவு குவித்து வைத்திருக்கிறீர்கள் என்பதை பாருங்கள். யாரோ ஒருவர் அவற்றை வைத்திருப்பதைப் பார்த்து, நீங்களும் கூட அவற்றை வைத்திராவிட்டால், அவர்களது நட்பு வட்டத்தில் நீங்கள் தாழ்வாகக் கருதப்படுவீர்கள் என்று கருதி, அவற்றை எல்லாம் வாங்கி வைத்திருக்கிறீர்கள்! காலத்திற்கு ஒத்ததாக இருக்கவேண்டுமெனும் ஆசை, நாகரீக மோகம் என்கிற முட்டாள்தனம், உங்களை இத்தனை வேண்டாத வழக்கங்களையும் பொருட்களையும் சேகரிக்கச் செய்துள்ளது. நீங்கள் இன்றியமையாதவை என்று கருதுபவற்றை விட மிகக் குறைவான பொருட்களோடு, மனிதனால் மகிழ்ச்சியுடன் இருக்க முடியும். ஏதாவது ஒரு பொருள் உங்களோடு சில காலம் இருந்து விட்டால், அது தவிர்க்க முடியாதது என்று கருதுகிறீர்கள்; உங்களுக்கு, அது இல்லாமல், எப்படி இருக்க முடியும் என்பது தெரிவதில்லை. படோடோபத்தினால், ஒரு பட்டுப் பூச்சி போல, உங்களைச் சுற்றி நீங்களே ஒரு கூட்டைக் கட்டிக் கொள்கிறீர்கள்! நிதிநிலை மற்றும் ஆன்மிக கண்ணோட்டத்தில் பாதிப்பு ஏற்படுத்தக் கூடிய விலையுயர்ந்த பழக்கங்களை வளர அனுமதிக்காதீர்கள். தேர்ந்த கண்ணோட்டத்தோடு உங்கள் விருப்பு வெறுப்புகளை ஆராய்ந்து, எவையெல்லாம் உங்கள் முன்னேற்றப் பாதைக்குத் தடையாக இருக்கின்றதோ அவற்றை உதறித் தள்ளுங்கள்.