யாராவது உங்களை அவமானப்படுத்தினாலோ அல்லது இகழ்ந்தாலோ அல்லது உதாசீனப்படுத்தினாலோ, அதை ஒரு இன்முகத்துடன் ஏற்றுக் கொள்ளுங்கள். "இதுதான் உலகத்தின் நியதி; அது நன்றி இல்லாதது, மரியாதையற்றது! அவர்கள் எனக்கு நல்லதே செய்கிறார்கள், என்னுடைய மனவலிமை பரிசோதிக்கப்படுகிறது, நான் கோபத்திற்கோ அல்லது வெறுப்பிற்கோ இடமளிக்கக் கூடாது" என்ற உற்சாகமூட்டும் வார்த்தைகளை உங்களுக்கு நீங்களே கூறிக்கொண்டு, உங்களுடைய உதடுகளில் ஒரு வெற்றிப் புன்னகையோடு அமைதியாக இருங்கள்! ஒரு சாது, ஒரு குறும்புக்கார இளைஞர் கும்பலால் பரிகசிக்கப்பட்டார். "நடத்துங்கள்! நடத்தி சந்தோஷத்தை அடையுங்கள்! இந்த வாய்ப்பால் நீங்கள் மிகவும் சந்தோஷம் அடைவதை நான் பார்க்கிறேன். இதைத் தான் நீங்கள் பெறவேண்டும் என நான் விரும்புகிறேன்" என்று அவர் சொன்னாராம். யாரோ ஒருவர் உங்களை இழிவுபடுத்துவதை நீங்கள் ஏற்காதபோது, அதில் ஈடுபட்டவரிடமே அது திரும்பிச் சென்று விடுகிறது. ஒரு பதிவுத் தபால் ஏற்றுக் கொள்ளப்படாத போது, அது அனுப்பியவரிடமே திரும்பி விடுவதைப் போல! அந்தக் கடிதத்தைப் பெற்றுக் கொண்டு, அதில் உள்ளதைப் படிப்பதன் மூலம் உங்களுடைய மனஅமைதியைக் கெடுத்துக் கொள்ளாதீர்கள். அதைப் பெற மறுத்து விடுங்கள். தவறு செய்தவர்களையும் கூட திருத்த உங்களுக்கு ஒரு வாய்ப்பு உள்ளது; ஆனால் அதை ஏற்றுக்கொண்டு விட்டால், நீங்களும் குறும்புக்காரர்களுடன் சேர்ந்தவராக ஆகி விடுகிறீர்கள்! எனவே, எச்சரிக்கையாக இருங்கள்! (தெய்வீக அருளுரை, ஏப்ரல் 1973)