இராமாயணத்தை பாராயணம் செய்வதும், அதன் ஸ்லோகங்களைப் பற்றிய உபன்யாசங்களைக் கேட்பதும், மனிதர்களை தர்மத்தின் ஒரு திருவுருவமாக நல்மாற்றம் செய்யவேண்டும். அவர்களது ஒவ்வொரு சொல், சிந்தனை மற்றும் செயலும் இந்த இலட்சியத்தின் உதாரணமாக இருக்க வேண்டும். தன் மீது மற்றும் ஸ்ரீராமர், இராமாயணம் ஆகியவற்றின் மீதுள்ள சிரத்தை (நிலையான நம்பிக்கை) வெற்றிக்கு இன்றியமையாதது. எதை அடைவதற்காக? நல்லவர்களாக ஆகி, மற்றவர்களும் அவர்களது நல்ல தன்மையை மலரச் செய்ய உதவுவதற்குமே. விசாலமான மனிதப் பண்புகளுடன் கூடிய முழுமையான மனிதனாக ஆகி, பிறருக்கு உதவுவதற்கு அந்தப் பண்புகளை சமுதாயத்தில் ஊக்குவியுங்கள். புனிதமான பணிகளின் மூலமாக உடலைத் தூய்மைப்படுத்துங்கள். சத்யம், ப்ரேமை மற்றும் பரிவு ஆகியவற்றைக் கொண்டு பேச்சைத் தூய்மைப்படுத்துங்கள். புலன்களின் ஆர்ப்பாட்டத்திற்கும், அவை வளர்க்கும் ஆசைகளுக்கும் அடிபணியாமல் இருப்பதன் மூலம் மனதைத் தூய்மைப்படுத்துங்கள். இப்போதெல்லாம் படித்தவர்கள் எந்த தார்மீக பொறுப்பையும் ஏற்றுக் கொள்வதில்லை என்பது கசப்பான உண்மையாகும். மனிதாபிமானமற்ற நோக்கங்களால் களங்கமடைந்த சிந்தனை, சொல் மற்றும் செயல்களைக் கொண்ட மனிதர்கள், விஞ்ஞானம் மற்றும் தொழில் நுட்பத்தின் மீது ஆதிக்கம் பெற்று இருப்பதால், உலகமே அச்சத்தால் சூழப்பட்டுள்ளது. புலன்களே மனதிற்கு தீனி போடுகின்றன. மனம் அஹங்காரத்தின் விளைவு. அஹங்காரம் ஆத்மாவின் ஒரு பிரதிபலிப்பு. பரமாத்மாவின் (என்ற கடலின்) ஒரு அலையே ஆத்மா. ஒவ்வொருவரும் அஹங்காரத்தின் ஆன்மிக மூலத்தைக் கண்டறிந்து, வாழ்க்கையை அந்த பாரம்பரியத்தின் பாதையில் செலுத்த வேண்டும். (தெய்வீக அருளுரை, ஏப்ரல் 18,1986)