ஒரு தேசம் என்றால், பூமியின் ஏதோ ஒரு பாகம் என்பதல்ல. மனிதர்களே ஒரு தேசத்தை உருவாக்குகிறார்கள். மனமாற்றம் என்பது ஒரு பரிமாணத்தில் மட்டுமே இருக்கக் கூடாது. அது, மனிதர்கள் தங்களது தீய சிந்தனைகள் மற்றும் செயல்களை விட்டொழித்து, நற்சிந்தனைகளை வளர்த்துக் கொண்டு, அன்றாட வாழ்க்கையில் நற்கருமங்களை ஆற்றுவதற்கு ஏற்றவாறு அவர்களை சீரமைக்கும் முழுமையான முறையாகும். ஒரு மனிதனுடைய மதிப்பு என்பது, அவன் அல்லது அவளின் கல்வித் தகுதிகளிடமிருந்து மட்டுமே பெறப்படுவதில்லை. ஒருவரது வாழ்க்கை முறையின் கலாசார சீர்திருத்தமும் மிகவும் இன்றியமையாததாகும். கலாசாரமற்ற ஒரு வாழ்க்கை வெளிச்சமற்ற ஒரு வீடு போன்றதாகும். கலாசாரமற்ற ஒரு மனிதன், அங்கும் இங்கும் அலைபாயும் கயிறற்ற ஒரு பட்டம் போன்றவனே. கலாசாரமற்ற ஒரு கல்வி ஒரு போலி நாணயத்தைப் போன்று மதிப்பற்றது. கலாசாரம் என்றால் என்ன? அது, மனிதனுள் பொதிந்திருக்கும் தெய்வீகத்தை உணர்ந்து அதை ஒருவரது வாழ்க்கை முறையில் வெளிப்படுத்தச் செய்வதே ஆகும்.