என்னுடைய உபன்யாசங்களையும், உத்தரவுகளையும் கேட்கக் கூடிய விலை மதிப்புள்ள வாய்ப்பினை நீங்கள் பெற்றுள்ளீர்கள். இவை உங்களது இதயங்களில் பதிந்துள்ளன; உங்களுடைய உரையாடல்கள் எல்லாம், என் மீதும், என் வார்த்தைகள் மீதும், எனது லீலைகள் மற்றும் எனது மகிமைகள் மீதும் நிலை கொண்டுள்ளன. இந்தப் போற்றுதலை வாழ்க்கையில் கடைப்பிடியுங்கள் என்பதே என் அறிவுரையாகும். உங்களது நகரங்கள் மற்றும் கிராமங்களில் உள்ள உங்களது சகாக்களுக்கு, நீங்கள் எவ்வளவு கட்டுப்பாடுடன் இருக்கிறீர்கள், எவ்வளவு சிரத்தையாக நீங்கள் உங்களது பெற்றோர்களுக்கு அடிபணிகிறீர்கள் மேலும் உங்களது ஆசிரியர்களை நீங்கள் எவ்வளவு ஆழமாக மதிக்கிறீர்கள் என்பதை எடுத்துக் காட்டுங்கள். உங்கள் இடத்தில், நல்லொழுக்கம் மற்றும் சுயக் கட்டுப்பாட்டினால் பிரகாசிக்கும் ஒரு ஒளியாக, ஒரு விளக்காக இருங்கள். ஒழுக்கமற்ற, கெட்ட பழக்கவழக்கங்கள், பொறுப்பற்ற தன்மை மற்றும் தீய பழக்க வழக்கங்களுக்குள் திரும்பிச் செல்ல வேண்டாம். உணவைப் பற்றிக் குறை கூறாதீர்கள்; உங்களுக்கு கிடைக்கும் நல்ல உணவை சந்தோஷமாக உட்கொள்ளுங்கள்! நீங்கள் செய்ய வேண்டி வரும் எந்த வேலைக்கும் எதிர்ப்புத் தெரிவிக்காதீர்கள்; அவற்றை சந்தோஷமாக செய்து முடியுங்கள். உங்களது முதியவர்களை கவனித்துக் கொள்ள வேண்டி வரும் போது, உங்களுக்கு அந்த வாய்ப்புக் கிடைத்ததற்காக மகிழ்ந்து, அவர்களை சந்தோஷமாகவும், புத்திசாலித்தனமாகவும் பேணுங்கள். எனவே, உங்களைக் காணும் நான், உங்களது அனைத்து சிந்தனைகள், சொற்கள் மற்றும் செயல்களையும் அறிந்த நான், உங்கள் மீது எனது அருளை மேலும் மேலும் பொழிவேன் என்ற நம்பிக்கையுடன், இங்கும்,எங்கும், இப்போதும், எப்போதும் வாழுங்கள்.

உங்கள் இல்லங்களை, நல்லொழுக்கம், அறநெறி மற்றும் அன்பின் இருப்பிடமாக ஆக்குங்கள். கோபத்தையும், பேராசையையும் கட்டுப்படுத்துங்கள் .அதுவே உண்மையான பக்தனின் சின்னமே அன்றி, கட்டுப்பாடற்ற பேச்சு மற்றும் அலைந்து திரிதலும் அல்ல- பாபா