ப்ரேமை தெய்வீகமானது. அனைவரையும் நேசியுங்கள்; ப்ரேமை இல்லாதவர்களுடனும் கூட உங்கள் ப்ரேமையைப் பகிர்ந்து கொள்ளுங்கள். பரிசுத்தமான ப்ரேமை ஒரு மாலுமியின் திசை காட்டியைப் போன்றது. நீங்கள் அதை எங்கு வைத்தாலும், அது இறைவனை நோக்கியே காட்டும்! உங்கள் அன்றாட வாழ்க்கையின் ஒவ்வொரு செயலிலும் தன்னலமற்ற ப்ரேமையை வெளிப்படுத்துங்கள். அதிலிருந்து தெய்வீகம் வெளிப்படும்! இறைவனை உணருவதற்கான மிகவும் எளிதான வழி இதுவே. ஆனால் மனிதர்கள் ஏன் இந்தப் பாதையில் செல்வதில்லை? ஏனெனில், அவர்கள் இறைவனை அடைவதற்கான வழியைப் பற்றிய தவறான அபிப்பிராயத்தினால் ஆட்டிப் படைக்கப் பட்டு உள்ளார்கள். அவர்கள் இறைவன், கடுமையான ஆன்மீக சாதனைகளால் மட்டுமே பெறக்கூடிய எங்கோ இருக்கும் ஒன்று என்று கருதுகிறார்கள். இறைவன் அங்கிங்கெனாதபடி எங்கும் நிறைந்தவன். இறைவனை எங்கும் தேட வேண்டிய அவசியமில்லை. நீங்கள் காண்பது அனைத்தும் இறைவனின் வெளிப்பாடுகளே. நீங்கள் காணும் அனைத்து மனிதர்களும் இறைவனின் ஸ்வரூபங்களே.உங்களது தவறான திருஷ்டியைத் திருத்திக் கொள்ளுங்கள்; இறைவனை எங்கும் உணர்வீர்கள். அன்பாகப் பேசுங்கள், அன்புடன் செயலாற்றுங்கள், அன்புடன் சிந்தியுங்கள்; மேலும் ஒவ்வொரு செயலையும் அன்பு நிறைந்த ஒரு இதயத்துடன் ஆற்றுங்கள். தெய்வீக ப்ரேமையின் பாதையே, இறைவனைச் சென்றடைவதற்கான மிகவும் எளிதான, மிகவும் இனிமையான, மிகவும் நிச்சயமான பாதை என்பதைப் புரிந்து கொள்ளுங்கள்.