புலன்கள் ‘’ ஏன் போராடுகிறாய்? உன்னால் முடிந்த வரை , உண்டு, உறிஞ்சி, உல்லாசமாக இருந்து விடு ‘’ என்று கூறும்; ஆனால் குருவோ, ‘’எந்த முன் அறிவிப்பும் இன்றி மரணம் உன் மீது பாயும்; அந்த அழைப்பு வருவதற்கு முன் அதைப் பற்றிய அச்சத்தை இப்போதே வென்று விடு ‘’ என்று கூறுவார். ‘’ இப்போது ‘’ என்பதே உண்மையான நண்பன்; ‘’ நேற்று ‘’ என்பது உன்னை ஏமாற்றி விட்டுச் சென்று விட்டது; ‘’நாளை’’ என்பது ஒரு சந்தேகத்திற்கு உரிய வருகையாளர். ஒரு முறை அவரது மூத்த சகோதரனான தர்மராஜர், ஒரு முனிவருக்கு, யாகத்திற்கான சில உதவியை அளிப்பதாக உறுதி அளித்து, அவரை மறுநாள் வருமாறு கூறிய போது, பீமன், ‘என்னுடைய சகோதரர் கண்டிப்பாக நாளை வரை உயிரோடு இருப்பார். குறைந்த பட்சம் அப்படித் தான் நடக்கும் என அவர் நம்புகிறார் ‘’ எனக் கூறி, அனைத்து முரசுகளையும் ஒலிக்கச் செய்து, அனைத்து கொடிகளையும் ஏற்றச் சொன்னாராம். புதரில் பதுங்கியுள்ள புலியைப் போல, மரணம் உங்களது அடிச்சுவடுகளைப் பின் தொடர்ந்து கொண்டே இருக்கிறது. எனவே, மேலும் நேரத்தை வீணடிக்காமல், சோம்பலையும், கோபத்தையும் விட்டு விட முயலுங்கள்; புயல்களுக்கு நடுவிலும் அமைதியாக இருந்து, சாந்தமானவர்களின் நட்பு வட்டத்தில் கலந்து கொள்ளுங்கள். அனைவர் மீதும் கொண்ட ப்ரேமையால் நிரம்பிய தெய்வீக சிந்தனைகளின் வெளிப்படும் நறுமணம் உங்களைச் சுற்றிலும் எழட்டும். பரப்ரம்மத்தைப் பற்றி அனுபவ ரீதியாக பெறப்படும் ஞானம் எனும் நெருப்பு, பல பிறவிகள் மற்றும் அனுபவங்களின் மூலம் பெறப்பட்ட வாஸனாக்களை, சுட்டுப் பொசுக்கி சாம்பலாக்கி விடும். அந்த உலையின் வெப்பத்தில், கசடுகள் எரிக்கப் பட்டு, விலைமதிப்பற்ற தங்கம், தனியாக எடுக்கப் படும்.