கோபம் கொள்வது என்பது, ஒரு கணப் பொழுதில் செய்யப் படும் முயற்சியே; ஆனால் வாழ்க்கையின் ஏற்றத் தாழ்வுகளால் பாதிக்கப்படாமல் இருக்கும் சாந்தியைப் பெறுவது, பல வருடங்களில் செய்யப் படும் பயிற்சியின் விளைவாகும். புலன்களின் அனுபவ வட்டத்தில் இருக்கும் அனைத்து உலகியலான பொருட்களும் அடிப்படையில் இல்லாதவையே என்ற உறுதியான நம்பிக்கையைக் கொண்டு மட்டுமே, சாந்தியை நிலைநாட்ட முடியும்.ஒன்றே ஒன்றாக இருப்பதை, பலவாறாகக் காண வைக்கும் இயல்பான, மாயையின் விளை பொருட்களே அவை. சடலங்கள் ஒன்றன் பின் ஒன்றாக சவக் குழியில் செல்வதை நீங்கள் காண்கிறீர்கள்; ஆனால், அவற்றால் பாதிக்கப் படாதவர் போல நடந்து கொள்கிறீர்கள்; நீங்கள் மட்டுமே நிரந்தரமானவர் என எண்ணுகிறீர்கள். உண்மையில் தெய்வீக ஆத்மாவாகிய நீங்கள் நிரந்தரமானவரே! எவ்வாறு நீங்கள் அருந்தும் தண்ணீர் வியர்வையாக வெளியேற்றப் படுகிறதோ, அவ்வாறே, நீங்கள் குவித்து வைத்துள்ள கர்மா, அவற்றை சந்தோஷமாக ஏற்றுக் கொள்வதன் மூலமே நீக்கப் படுகிறது. எனவே, ‘’ மகிழ்ச்சியையும், முனகலையும் ‘’ சமமான அமைதியுடன் சகித்துக் கொள்ளுங்கள். எவ்வாறு, ஒரு பானையில் இருக்கும் காலியிடம், வெளியில் உள்ள அண்டத்துடன் இரண்டறக் கலந்து விடுகிறதோ, அவ்வாறே, அமைதியாக, முழுமையாக, எந்தவிதமான பிரிவோ அல்லது தனித்தன்மையோ இன்றி, பிரபஞ்சமயமானவற்றுடன் இரண்டறக் கலந்து விடுங்கள். அதுவே, சரணாகதியும், சாபல்யமும், விடுதலையும் ஆகும்!