ப்ரேமையின் திருவுருவங்களே! புத்த பூர்ணிமா, ப்ரேமையே, முழுமைக்கான ( பரிபூரணத்திற்கான) பாதை என்பதை நமக்கு நினைவூட்டுவதற்காகக் கொண்டாடப்படுகிறது. புத்த பூர்ணிமா அன்று மட்டும் ஆனந்தமாக இருந்தால் போதாது. ஆனந்தத்தை எப்போதும் நீங்கள் அனுபவிக்க வேண்டும்; பகவான் புத்தரின் போதனைகளைக் கடைப்பிடிப்பதன் மூலம், அவ்வாறு நீங்கள் இருக்க முடியும். பகவான் புத்தரின் போதனைகள், உயர்ந்தவை, உன்னதமானவை மற்றும் புனிதமானவை. அவற்றில் மிகவும் முக்கியமானது –அஹிம்சையே அனைத்து தர்மங்களிலும் தலைசிறந்தது ( அஹிம்ஸா பரமோ தர்ம: ) என்பதாகும். அவர் நாட்டின் எல்லா பிரதேசங்களுக்கும் சென்று, மக்களுக்கு தெய்வீக ப்ரேமையின் பாதையைப் பின்பற்றுமாறு அறிவுறுத்தினார். பகவான் புத்தர், படாடோபம், ஆடம்பரம் மற்றும் முகஸ்துதி ஆகியவற்றை விரும்பியதில்லை. அவர் எளிமையாகவும், எப்போதும் சாந்தமாகவும், பரிசுத்தமாகவும், பணிவாகவும், எப்போதும் ப்ரேமை மற்றும் பரிவு நிறைந்தவராகவும் இருந்தார். புத்தரைப் பற்றிய வெறும் சொற்பொழிவுகளை மட்டும் செய்து கொண்டு இருக்காதீர்கள்; அவரது போதனைகளைக் கடைப் பிடிப்பது அதை விட முக்கியமானதாகும். பகவான் புத்தரிடம் மரியாதையும், பயபக்தியையும் காண்பிப்பதற்கு இதுவே சரியான வழியாகும்.உங்களது சொந்த நலனுக்காக, அவரது போதனைகளைக் கடைப்பிடிப்பது என்று ஆத்மார்த்தமாக இன்று உறுதி எடுத்துக் கொள்ளுங்கள்.