ஒரு கவிஞர், ‘’ அவளது இடுப்பில் குழந்தையை வைத்துக் கொண்டு, ஒரு தாய் தனது குழந்தையைத் தேடி அலைந்தாராம். அவள் ஒவ்வொரு குழந்தையின் முகத்தை , அது அவளுடையதா என்று உற்றுப் பார்த்துக் கொண்டு இருந்தாராம். அவள் ஒரு கனியாத பழமே !’’ என்று பாடினார். நீங்கள் அனைவரும் அந்தத் தாயைப் போலத்தான் இறைவனைத் தேடுகிறீர்கள்.ஏன் ஒரு கனியாத பழம்? கனியாத பழம் கசப்பாக இருக்கும்; ஆனால், அது கனிந்த பிறகு உள்ளிருக்கும் இனிமை வெளி வருகிறது. நம்முள் உறையும் தெய்வீகத்தைக் கண்டு கொண்டு, அதை அபிவிருத்தி செய்து கொண்டால் தான், ஒருவர் கனிய முடியும். இறைவனில், இறைவனுடன், இறைவன் மீது, இறைவனுக்காக, வாழுங்கள். இறைவனையே அருந்துங்கள், இறைவனையே உண்ணுங்கள்,இறைவனையே காணுங்கள், இறைவனையே அடையுங்கள். இறைவனே சத்தியமும், சாரமும், மனிதனின் இதயமும் ஆவான். நீங்கள் இப்போது என் பேச்சை ஒலி நாடாவில் ( காஸட் ) பதிவு செய்து கொண்டு இருக்கிறீர்கள். ஆனால், ஒலி நாடாவில் என் குரலையோ அல்லது வார்த்தைகளையோ நீங்கள் காண முடியுமா? இல்லையே. நீங்கள் அதைத் திரும்பப் போட்டுப் பார்க்கும் போது தான், நீங்கள் வார்த்தைகளைக் கேட்க முடியும். அதைப் போல, உடலே அந்த ஒலி நாடா, இறைவனது குரல் அதில் உறைகிறது. அதில் நம்பிக்கையை ஊட்டி, ப்ரேமையால் இசைத்துப் பாருங்கள். பின்னர் நீங்கள் என் குரலையும், வார்த்தைகளையும் உட்கிரகிக்க முடியும். ஒரு பரிசுத்தமான இதயம், ஒரு தூய்மைப் படுத்தப் பட்ட மனம் மற்றும் ஒரு இறை உணர்வு நிரம்பிய மனச்சாட்சி, உங்களுள் உறையும் இறைவனின் குரலைக் கேட்க, உங்களுக்கு உதவும்.