மனதின் கோமாளித்தனங்கள் விசித்திரமானவை ! தனக்கென்று ஒரு குறிப்பிட்ட ரூபமோ அல்லது வடிவமோ அற்ற அது, தான் ஈடுபடும் பொருளின் ரூபம் மற்றும் வடிவத்தை ஏற்றுக் கொண்டு விடுகிறது. ஒரு விருப்பத்திலிருந்து மற்றொன்றிற்கும், ஒரு ஆசையிலிருந்து , மற்றொன்றிற்கும் அலைந்து திரிவது அதன் இயல்பு.எனவே தான் அது நஷ்டம் மற்றும் சோகம், உற்சாகம் மற்றும் மனச்சோர்வு ஆகியவற்றை உண்டாக்குகிறது. அதன் விளைவுகள் நேர்மறை மற்றும் எதிர்மறை என்ற இரண்டுமே. எனவே, மனதின் குணாதிசியங்களைப் புரிந்து கொண்டு, உங்களுக்கு நன்மை கிடைப்பதற்கு ஏற்றவாறு, அதை அடக்கி ஆள்வதற்கான வழிகளைக் கற்றுக் கொள்ளுங்கள். மனம், அனுபவங்களை சேகரித்து அதை தனது நினைவில் அடுக்கி வைத்துக் கொள்ளப் பழக்கப் பட்டது. அது, விட்டு விடும் கலையை அறியாதது. அதன் விளைவாக,துக்கம், கவலை மற்றும் துன்பம் ஆகியவை அதில் கொதி விட்டுக் கொண்டே இருக்கும். உங்களில் பலர் பஜனை, வழிபாடு மற்றும் தியானத்தில் ஈடுபடுகிறீர்கள். உங்களையே நீங்கள் கேட்டுக் கொள்ளுங்கள்: ஆன்மீக சாதனையில் உங்கள் இதயம் ஆத்மார்த்தமாகப் பொங்கி வழியவோ அல்லது துடிக்கவோ செய்கிறதா? உயர்ந்த மற்றும் சீரிய குறிக்கோளின் மூலம், சிறிய ஆன்மீக சாதனையை புனிதப் படுத்த நீங்கள் பாடுபடுகிறீர்களா? இல்லை என்றால், இந்தச் செயல்கள் எல்லாம் வெறும் உடற்பயிற்சிகளாகவே இருந்து விடும் ! நீங்கள் உங்கள் மனதிற்கு தியாகத்தைக் கற்றுக் கொடுத்தால், நீங்கள் ஆன்மீகத்தில் சாந்தி பெற்றவர்களாக ஆக முடியும் !