ஆத்மாவின் தன்மையைப் பற்றிய ஆராய்ச்சி இல்லாமையே இன்றைய மிகப் பெரிய குறையாகும். இந்த அனைத்து அமைதியின்மைக்கும், அதுவே மூல காரணம். உங்களைப் பற்றிய உண்மையை அறிந்து கொள்வதில் நீங்கள் ஆர்வமாக இருந்தால், பின்னர், நீங்கள் கடவுளை நம்பவில்லை என்றாலும் கூட, நீங்கள் வழி தவறிப் போக மாட்டீர்கள். அனைத்து கலக்கங்களும் ஒரு நாள் தீர்ந்து தானே ஆக வேண்டும் இல்லையா? உங்களது ஆத்மாவின் தன்மையைப் பற்றிய ஆராய்ச்சி, உபநிஷதங்களில் சிறப்பாக விளக்கப் பட்டுள்ளது. எவ்வாறு ஒரு நதியின் ஓட்டமும், வெள்ளப் பெருக்கும் கரைகளால் சீர் படுத்தப் பட்டு, கடலை நோக்கி செலுத்தப் படுகிறதோ, அவ்வாறே, உபநிஷதங்களும், புலன்கள், மனம் மற்றும் புத்தியை சீரமைத்து, கட்டுப் படுத்தி, ஒருவர் கடலை அடைவதற்கும், ஜீவாத்மா, பரமாத்மாவுடன் ஒன்றரக் கலப்பதற்கும் உதவுகின்றன. ஒரு வரைபடத்தை மேலாகப் பார்ப்பதோ அல்லது வழிகாட்டிப் புத்தகத்தைப் புரட்டுவதோ, ஒரு இடத்தை நேரில் பார்ப்பதன் சிலிர்ப்பை, உங்களுக்குத் தர முடியுமா? அந்தப் பிரதேசத்தில் செய்யும் ஒரு பிரயாணம் தரும் சந்தோஷம் மற்றும் அறிவின் ஒரு சிறு பங்கையாவது, அது தரமுடியுமா? உபநிஷதங்களும், ஸ்ரீமத் பகவத் கீதையும், உங்களது வரைபடங்களும், வழிகாட்டிப் புத்தகங்களுமே. அவை தரும் அறிவுரையை நடைமுறையில் கடைப்பிடித்து, அவற்றை அனுபவ ரீதியாக உணரும் நோக்கத்துடன், உபநிஷதங்களையும், வேதங்களையும், படியுங்கள்.