நீங்கள் இந்த பரந்து விரிந்த பிரபஞ்சத்தில் பிறந்துள்ளீர்கள். நீங்கள் இந்த விசாலமான உலகில் வசித்துக் கொண்டு இருக்கிறீர்கள். எனவே, உங்களுக்கு பரந்த மனப்பாங்கு இருக்க வேண்டும். இந்த, பரந்து விரிந்த உலகில் பிறந்த மனிதனுக்கு, குறுகிய உணர்வுகள் இருக்கக் கூடாது. பிறரிடம் குறைகள் காண்பது தவறு. அவர்களிடம் குறைகள் இருக்கலாம். ஆனால், அவர்களது தவறுகளைப் பார்க்காதீர்கள்; அவர்களது நல்ல குணங்களைப் பாருங்கள். பின்னர், இந்த பிரபஞ்சமனைத்தும் ஒரு குடும்பமாக ஆகி விடும்.’’ மனிதரனைவரும் சகோதரர்களே, மாதவனே தந்தை ‘’ என்பதன் சாரம் இதுவே. இப்படிப் பட்ட உணர்வுகள் பிரபஞ்சமயமான சகோதரத்துவத்தைப் பேணுகின்றன. ‘’ மமை வாம்ஸோ ஜீவலோகே ஜீவபூத ஸனாதன ‘( அனைத்து ஜீவராசிகளிலும் உறையும் ஆத்மா எனது (இறைவனது) ஒரு அங்கமே)’’. படைப்பனைத்தின் மூலாதாரம் தெய்வீகமே. படைப்பும் அவனே, படைத்தவனும், இந்த பிரபஞ்சத்தை இயக்குபவனும் அவனே. தெய்வீகம் கண்களுக்குப் புலப்படாது. அதைப் புரிந்து கொள்ள முடியாது. நீங்கள் அனைவரும் தெய்வீகத்தின் பிரதிபலிப்புகளே என்பதை உணருங்கள். பின்னர், நீங்கள் எவரையும், வெறுக்கவோ அல்லது எவரைப் பற்றியும் பொறாமை கொள்ளவோ மாட்டீர்கள் ; நீங்கள் அஹங்காரமற்றவர்களாக ஆகி விடுவீர்கள்.