முந்தைய பிறவிகளில் செய்த குற்றங்களுக்காக நீங்கள் அனுபவித்து வரும் சிறைத் தண்டனையைப் போல,இந்த உலக வாழ்க்கையை , உங்கள் மீது திணிக்கப் பட்ட ஒரு கட்டாயக் கடமையாக ஆற்றுங்கள். சிறை அதிகாரி, சமைத்தல், கழுவுதல்,விறகு உடைத்தல் போன்ற பல வேலைகளைக் கொடுக்கிறார். எந்தப் பலனையும் எதிர் பாராது, உங்களுக்கு என்று கொடுக்கப் பட்ட பணியை, உங்களது முழுத் திறமையுடன் ஆற்றுங்கள். நீங்கள் நல்லபடியாக நடந்து கொண்டு, எந்தப் பிரச்சனையும் செய்யாமல், கொடுக்கப் பட்ட பணிகளை முகம் சுளிக்காமல் செய்தால், உங்களது தண்டனை முன்னதாகவே முடிக்கப் பட்டு, நீங்கள் ஒரு நன்னடத்தை சான்றிதழுடன் விடுவிக்கப் படுவீர்கள். இந்த மனப்பாங்கு, எந்தப் பலனையும் எதிர்பாராது, தன்னலமற்ற பணியை ( நிஷ்காம கர்மா ), நீங்கள் கடைப்பிடிக்க உதவும்; இது உங்களது புலன்களைக் கட்டுப் படுத்துவதில் மிகவும் மதிப்பு வாய்ந்ததாகும். பாண்டவர்கள் மனக்கலங்களால் பாதிக்கப் பட்ட போது, தர்மராஜா, பகவான் ஸ்ரீகிருஷ்ணரைப் பிரார்த்தித்தார். ஸ்ரீகிருஷ்ணர், அவர்களுக்கு ஆறுதல் கூறி, சில காலம் அவர்களுடன் கழித்தார்; தான் புறப்படும் போது, ஸ்ரீகிருஷ்ணர், தர்மராஜருக்கு, எப்போதெல்லாம் அவர் இன்பமோ அல்லது துன்பமோ அனுபவிக்க நேரிடுகிறதோ, அப்போது நினைவில் கொள்ள வேண்டிய ஒரு வரியை அளித்தார். அது தான் ‘’ இது நீடிக்காது ( எப்புடு உண்டது)’’. மனக்கலங்களை அமைதிப் படுத்துவதற்கு, இது ஒரு மிக சக்தி வாய்ந்த முறையாகும்.