ஒவ்வொரு குடும்பத்திலும், ஸ்ரீமத் ராமாயணத்தில் எடுத்துக் காட்டப்பட்டுள்ள சீலங்கள் கொண்டவர்கள் இருப்பார்களேயானால், இந்த பிரபஞ்சமே, சாந்தி , சந்தோஷங்களால் ஜொலிக்கும் ! தசரதர் அயோத்யாவை ஆண்டவர் என்பதும், மற்றும் அவருக்கு ராமர், லக்ஷ்மணர், பரதர், சத்ருக்னர் என்ற நான்கு மைந்தர்கள் இருந்தார்கள் என்பது, நீங்கள் அனைவரும் அறிந்ததே. நல்லது ! ஏதோ அயோத்யா என்ற ஒரு நகரம் இருந்தது, அதில் ஒரு சமயம் தசரதர் என்ற அரசன் இருந்தார், அவருக்கு ராமர் என்ற மகன் இருந்தார் என்பதற்காக, இந்தக் காலத்தில், தற்சமயத்தில் நாம் ஏன் ராமரின் பிறந்த நாளைக் கொண்டாட வேண்டும்? இந்தக் கதையை கொஞ்சம் ஆழ்ந்து சிந்தித்தால், தசரதர் ஏதோ எங்கோ உள்ள நாட்டின் அரசன் இல்லை என்பதை, நீங்கள் உணர்வீர்கள் ! அயோத்யா என்றால், ஒரு வெல்ல முடியாத நகரம், விரோதிகள் ஊடுருவ முடியாத, அசைக்க முடியாத ஒரு கோட்டை என்று பொருள். அதுவே, சபலங்கள், நுண்ணிய எதிரிகளான உணர்ச்சிகள், உணர்வுகள், உந்துதல்கள் மற்றும் சுபாவங்களுக்கு அப்பாற்பட்ட இடமான, இறைவன் உறையும் இதயம் எனும், ஆத்மாவைக் குறிக்கிறது. தசரதர் ? ஐந்து கர்மேந்திரியங்கள்,ஐந்து ஞானேந்திரியங்கள் என்ற பத்து அம்சங்களையும் கொண்ட உடல் எனும் தனது ரதத்தை முழுமையான கட்டுப்பாட்டில் வைத்திருப்பவர் எவரோ அவரே தசரதர்.