ஸ்ரீமத் பகவத் கீதையின் ஒரு பிரதி இருபத்தி ஐந்து பைசாவிற்குக் கிடைக்கலாம்; ஒரு கீழ்த்தரமான நாவலின் விலை பத்து ரூபாயாக இருக்கலாம். எது அதிக மதிப்பு வாய்ந்தது ? எது சாதாரண உலோகத்தை, தங்கமாக மாற்ற வல்லது ? ஆன்மீக சாதகர்களுக்கு என்று பொதுவாக விதிக்கப் பட்டுள்ள ஜபம், தியானம்,யக்ஞம், யாகம் ஆகியவற்றை விட , சேவையே அதிக பயனளிக்கும் என்பதை நினைவில் கொள்ளுங்கள். ஏனெனில், அது, அஹங்காரத்தை அழிப்பது, ஆனந்தத்தை அளிப்பது என்ற, இரண்டு வித குறிக்கோள்களை நிறைவேற்றுகிறது. உங்களுக்கு அருகில் அமர்ந்திருப்பவர், சோகத்தில் மூழ்கி இருக்கும் போது, நீங்கள் சந்தோஷமாக இருக்க முடியுமா? இல்லையே ! உங்களது காதுக்கு எட்டும் தூரத்தில், ஒரு குழந்தை மிகவும் பரிதாபமாக அழுதால், உங்கள் கண்கள் பரிவின் காரணமாக, கண்ணீரின் குளமாகி விடுகின்றன. ஏன் ? இருவருக்கும் இடையில் கண்ணுக்குத் தெரியாத ஒரு பிணைப்பு இருக்கிறது. மனிதர்களுக்கு மட்டுமே இந்த பச்சாதாப உணர்வு இருக்கிறது; அவர்கள் மட்டுமே, பிறர் சந்தோஷமாக இருந்தால், சந்தோஷப்பட முடியும்; பிறர் துக்கமாக இருந்தால், தாங்களும் துக்கப் பட முடியும். அதனால் தான் , படைப்பனைத்திலும் தலை சிறந்தவர்கள் மனிதர்களே. மனிதர்கள் மட்டுமே சேவை ஆற்றும் திறன் கொண்டவர்கள்; அதுவே உங்களது தனிப்பட்ட மாட்சிமையும்,ஒப்பற்ற சிறப்பும் ஆகும். இந்த விலை மதிப்பற்ற பிறவியை முழுமையாகப் பயன்படுத்திக் கொள்ளுங்கள் !