சிறிய இறை நாமங்களாகிய ராமா, சாய் அல்லது க்ருஷ்ணா என்பவை, அளவற்ற ஸம்ஸார சாகரத்தைக் கடக்க உங்களுக்கு எவ்வாறு உதவ முடியும் என நீங்கள் வியக்கக் கூடும். மனிதர்கள் ஒரு பரந்து விரிந்த சமுத்திரத்தை ஒரு சிறிய தோணியின் மூலம் கடக்கிறார்கள்; அவர்கள் அடர்ந்த இருண்ட காடுகளை , அவர்களது கைகளில் உள்ள ஒரு சிறிய விளக்கை வைத்துக் கொண்டு கடந்து விடுகிறார்கள். மேலும் சிறிதான ஓம் எனும் ப்ரணவ மந்திரம், அளவற்ற ஆற்றல்களை உடையதாகும். தோணி , ஒரு கடல் அளவிற்குப் பெரியதாக இருக்க வேண்டும் என்ற அவசியமில்லை. இறை நாமஸ்மரணை என்பது, நிலத்தடி நீரை ஆழ் துளையிட்டு கொண்டு வருவதைப் போன்றதாகும்; அது, பளிங்குக் கல்லில் பொதிந்திருக்கும் இறைவனது ரூபத்தை செதுக்கிக் கொண்டு வரும் உளி அடியைப் போன்றதாகும். வெளி உறையை உடைத்து எறியுங்கள், இறைவன் வெளிப்படுவான்; பக்த ப்ரஹலாதன் தன் தந்தை ஹிரண்யகசிபுவிற்குச் சொன்னது போல, தூணைப் பிளந்தால், என்றும் அதில் இருக்கும் இறைவன் தன்னையே வெளிப்படுத்தி கொள்வான். ஒவ்வொரு தாயும், தனது மகளுக்கு, தயிரைக் கடைந்து, உள்ளுறையும் வெண்ணையை எடுக்கக் கற்றுக் கொடுக்கிறாள்.அதைப் போலவே, ஆன்மீகத் துறையில், அவனது திருநாமத்தை ஜபிப்பதன் மூலம் கிடைத்த நவநீதம் எனும் வெண்ணெயை பகவான் ஸ்ரீ கிருஷ்ணருக்கு அளித்த , யோகிகளிடமிருந்து கற்றுக் கொள்ளுங்கள்.