இறை அருள் என்பது மழை அல்லது சூரிய ஒளியைப் போன்றதாகும். அதைப் பெறுவதற்கு, மழை நீரைச் சேகரிப்பதற்கு பாத்திரத்தை நிமிர்த்தி வைப்பது அல்லது உங்களது இதயத்தின் கதவுகளை, சூரியன் ஒளியேற்றுவதற்கு ஏற்பத் திறந்து வைப்பது போன்ற, ஏதாவது கொஞ்சம் ஆன்மீக சாதனையை நீங்கள் செய்தே ஆக வேண்டும். ரேடியோவிலிருந்து ஒலி பரப்பப் படும் இசை உங்களைச் சுற்றி எங்கும் பரவி இருக்கிறது; ஆனால், நீங்கள் அதை இயக்கி, சரியான அலை வரிசைக்குத் திருப்பினால் தான், அதை நீங்கள் ரசிக்க முடியும். குறைந்த பட்சம் ஒரு சிறிதளவாவது ஆன்மீக சாதனையை செய்து விட்டு இறை அருளுக்காகப் பிரார்த்தியுங்கள். இறை அருள் அனைத்தையும் சரி செய்து விடும். இறை அருள் உங்களுக்கு ஆத்ம சாக்ஷாத்காரத்தை அளிப்பதோடு கூடவே, ஒரு சந்தோஷமான, திருப்தியான வாழ்க்கையையும், கலக்கமற்ற சாந்தியில் நிலைகொண்டுள்ள ஒரு தைரியமான மனப்பாங்கையும் அளித்து விடும். வாழை மரத்தின் முக்கியமான பரிசு குலை குலையான அதன் பழங்களே. ஆனால், அதன் இலைகள், இளம் தண்டு, பூ மொட்டு ஆகியவையும், பயனளிக்கும் வகையில் உபயோகப் படும் கூடுதல் பொருட்களாகும். இறை அருளின் தன்மையும் அவ்வாறானதே. அது பலதரப்பட்ட தேவைகளைப் பூர்த்தி செய்கிறது.