உங்களது ஆன்மீக சாதனையை வைத்துத் தான் நீங்கள் மதிப்பிடப் படுகிறீர்களே அன்றி, நீங்கள் செல்லுகின்ற கோவில்களின் எண்ணிக்கையை வைத்தோ அல்லது அங்கு நீங்கள் அளித்துள்ள காணிக்கைகளின் விலையை வைத்தோ அல்ல. இறைவனின் திருநாமத்துடன் நீங்கள் கழித்த நேரத்தைக் கணக்கிட்டு, பெருமைப் பட்டுக் கொள்ளாதீர்கள் ! மாறாக, அந்த உறவிலிருந்து விலகி இருந்து, நீங்கள் வீணடித்த நேரத்தைக் கணக்கிட்டு பச்சாதாபப் படுங்கள். எப்போதும் இறைவனது திருநாமத்தை உங்கள் சிந்தனைகளில் வைத்திருங்கள்; நீங்கள் எந்த பேராபத்தையும், தைரியமாக எதிர் கொள்வீர்கள் ! சீதா மாதா , எவ்வாறு லங்கையில் எதிரிகளின் மிரட்டல்கள், இழிச்சொற்கள் மற்றும் கொடுமைகளைத் தாங்கிக் கொண்டார் என்பதை நினைவு கூறுங்கள்; அவருக்கு மனோபலத்தை அளித்தது எது? அது ஸ்ரீராம நாமமே அன்றி வேறில்லை.காமமும், க்ரோதமும், உண்மையான பக்தியுடன் ஒன்றிணைந்து இருக்க முடியாது. இறைவன் பால் நீங்கள் கொள்ளும் பக்தி ஆத்மார்த்தமானதாகவும், அசைக்க முடியாததாகவும் இருக்க வேண்டும். பக்தி என்பது ஜபமாலைகளோ, தாடிகளோ இல்லை; ஆராதனை என்பது மலர்களோ,கற்பூரமோ அல்ல.ப்ரேமை,சாந்தி, சந்தோஷம் எனும் அறுவடையைத் தருவதற்கு ஏற்றவாறு, பக்தி எனும் இளம் நாற்றிற்கு கவனமாக நீர் பாய்ச்சி, களை எடுத்து, உரமிட்டு, பூச்சிக் கொள்ளி தெளித்து, வளர்க்க வேண்டும்.