இன்று பகவான் ஸ்ரீ கிருஷ்ணரின் பிறந்த நாளான கோகுலாஷ்டமி ஆகும். விசேஷமான தின்பண்டங்களுடன் அதைக் கொண்டாடுவது அவ்வளவு முக்கியமல்ல. அதை விட முக்கியம் பகவான் ஸ்ரீகிருஷ்ணரது போதனைகளைப் பின்பற்றுவதாகும். பகவான் ஸ்ரீகிருஷ்ணர் எங்கு பிறந்தார்? ஒரு சிறையில் ! அவரிடம் என்ன சொத்துக்கள் இருந்தன ? எதுவும் இல்லை ! சிறையில் பிறந்த பின் அவர் நந்தகோபரது இல்லத்திற்கு எடுத்துச் செல்லப் பட்டார்; பின்னர் மதுராவிற்குச் சென்றார். அவரிடம் சொத்து என்று எதுவுமே இருந்தது இல்லை. இருந்தாலும், அவர் இந்த உலகின் தலைசிறந்த தலைவராக ஆனார். இது எதைக் காட்டுகிறது? உன்னத நிலையை அடைவதற்கான ரகசியம், உலகியலான சொத்துக்கள் இல்லை. பகவான் ஸ்ரீகிருஷ்ணரின் மஹிமை அவர் எப்போதும் ஆனந்தமாக இருந்ததில் இருக்கிறது. பகவான் ஸ்ரீகிருஷ்ணர் இந்த உலகிற்கு ஒரு நிரந்தமான உபதேசத்தை அளித்துள்ளார்- அவர் எதையும் நாடவில்லை, எதையும் தனக்கென்று வைத்துக் கொள்ளவில்லை, ஆனால் அவர் அனைத்தையும் பிறருக்கு என அளித்து விட்டார். அவர் தனது தாய் மாமனான கம்ஸனை வதம் செய்தார்; ஆனால் அவரது நாட்டை அபகரித்துக் கொள்ளவில்லை. அவர் கம்ஸனது தந்தையான உக்ரசேனரை அரியணையில் அமர்த்தினார். பாண்டவர்கள், கௌரவர்களை வீழ்த்த அவர், உதவினார்; தர்மராஜரை சக்ரவர்த்தியாக மகுடம் சூட்டி வைத்தார். அவர் கோடிக் கணக்கானவர்களின் இதயங்களை ஆளும்,அரசருக்கு எல்லாம் அரசராவார் !