சூரியனால் உருவாக்கப் பட்ட நீர்த் திவலைகள் ஒரு மேகமாக ஆகி, சூரியனையே மறைத்து விடுகின்றன. அதைப் போலவே, மனதில் எழும் சிந்தனைகள் ஆத்மாவை மறைத்து விடுகின்றன.எப்போது மனது அழிக்கப்படுகிறதோ, அப்போது, ஆத்மா மட்டுமே இருக்கிறது. மனதை அழிப்பதற்கும், அதிலிருந்து வரும் மாயைத் தோற்றங்களை நீக்குவதற்கும், ஆசைகள் கட்டுப்படுத்தப் பட வேண்டும். இன்றைய சாதகர்கள் அவர்களது ஆசைகளைக் கட்டுப்படுத்துவதில்லை. சுயநலமும், சுயநோக்கமும் விட்டொழிக்கப் பட வேண்டும் என்பதை நீங்கள் உணர வேண்டும். மனிதர்களைப் பீடித்திருக்கும் அனைத்து இன்னல்களுக்கும் சுயநலமே மூல காரணம். உலகம் திருந்த வேண்டும் என்றால், உங்களை நீங்களே திருத்திக் கொள்வதிலிருந்து தொடங்குவது சாலச் சிறந்தது. உங்களது தீய பண்புகளை அகற்றிட வேண்டும். உங்களை நீங்களே புனித சிந்தனைகளால் நிரப்பிக் கொள்ள வேண்டும். உங்களது உண்மை நிலையை உணராவிடில், மற்ற அனைத்து சாதனைகளும் பயனற்றவையே. நீங்கள் உங்கள் மனதை உள்நோக்கித் திருப்ப வேண்டும். மனதை வெளி உலகை நோக்கித் திருப்புவது சோகத்தையே விளைவிக்கும். மனதை இறைவன் பால் செலுத்தினால் மட்டுமே, நிரந்தர ஆனந்தத்தைப் பெற முடியும். அதுவே உண்மையான ஆன்மீக சாதனையாகும்.