பல விஞ்ஞானம் மற்றும் கலைகளைக் கற்றுத் தேர்ந்த நாரத மகரிஷியால், மனச் சாந்தியின் மூலம் கிடைக்கும் பேரானந்தத்தைப் பெற முடியவில்லை. மனச் சாந்தி இன்மையால் பீடிக்கப் பட்ட அவர், சனத்குமார முனிவரை அணுகி, தனது நிலைமைக்கான காரணம் என்ன என்று வினவினார்.அந்த முனிவர் நாரதரை, அவரது சாதனைகள் என்ன என்று கேட்டார். நாரதர் அந்த முனிவரிடம், தான் அனைத்து வேதங்கள் மற்றும் வேதாந்தங்களில் புலமை பெற்றுள்ளதாகவும், யானைகளைப் பயிலுவிப்பது, பசுக்களை வளர்ப்பது உட்பட, அறுபத்து நான்கு கலைகளிலும் தேர்ந்திருப்பதாகவும் கூறினார். தன்னுள்ளே நகைத்துக் கொண்ட, சனத்குமார முனிவர், ‘’இவை எல்லாம் மட்டுமே தான் உங்களது சாதனைகளா? ஓ நாரதரே ! நீங்கள் யார் என்று தெரிந்து கொள்ளாமல், மற்ற எல்லாவற்றையும் பற்றித் தெரிந்து கொள்வதால் என்ன பயன்? ‘’ என்று கேட்டார். மனிதர்கள் இந்த உலகில் உள்ள அனைத்தையும் பற்றித் தெரிந்து கொள்ள பலவிதமான முயற்சிகள் செய்கிறார்கள் .ஆனால் ஒருவரும் தாங்கள் யார் என்று புரிந்து கொள்ள எந்த விதமான முயற்சியும் செய்வதில்லை. எண்ணற்ற காலம், மற்ற விஷயங்களைப் பற்றித் தெரிந்து கொள்வதில் செலவிடப் படுகிறது; ஆனால் மனிதனுக்குத் தன்னைப் பற்றித் தெரிந்து கொள்வதற்கு நேரம் இல்லை.ஒருவரது பாண்டித்யம், புத்தி அல்லது பதவி எதுவாக இருந்தாலும், ஒருவர் தனது உண்மை நிலையைத் தெரிந்து கொள்ளவில்லை என்றால், மனச்சாந்தி மற்றும் சந்தோஷங்களைப் பெற முடியாது.