சில குருமார்கள், சீடர்களுக்கு, ஒரு மந்திர உபதேசம் செய்து ,அதைத் திரும்பத் திரும்ப உச்சாடனம் செய்யுமாறு அறிவுறுத்துவார்கள்.ஆனால் அவர்கள், சீடன் ஒரு கணம் கூட உதாசீனப்படுத்த முடியாத இயல்பான தெய்வீகத்தை வலியுறுத்தவோ அல்லது அவன் தனது உள்ளார்ந்த திறன்களைத் தெளிவுபடுத்த மிகவும் தேவையான ஒழுக்க புனரமைப்பை வற்புறுத்தவோ, செய்வதில்லை. மந்திர உபதேசம் செய்யும் குரு தீக்ஷா குரு ஆவார்; குணநலன்களை சீர்படுத்தும் குரு சிக்ஷாகுரு ஆவார்.இந்த இரண்டாவது குருவே, புனித நூல்களில் ஆயிரக்கணக்கான வழிகளில் பயபக்தியுடன் போற்றப் படுகிறார்; இவரே ,ஒருவரது திருஷ்டியில் உள்ள குறைகளை நீக்கி, அறியாமை எனும் இருளை அழிக்கிறார். ஒருவருக்கு ஆத்மாவை வெளிப்படுத்திக் காட்டி அவருக்கு மோக்ஷத்தை அளிக்கிறார். குரு பூர்ணிமா இத்தகைய குருமார்களுக்கு அர்ப்பணிக்கப் படுகிறது. இந்நாளில் சந்திரன்(மனதின் அதிபதி), பூரணமாகவும், தெளிவாகவும், குளுமையாகவும், பிரகாசமாகவும் இருக்கிறான் ! பிரகாசத்தைக் குறைக்கும் ஒரு குறையோ அல்லது களங்கமோ அதற்கு இல்லை. குருவும் இந்நாளில் அவ்வாறே சித்தரிக்கப் பட்டு, களங்கமற்றவராகவும், பிரகாசமானவராகவும், பாசமுள்ளவராகவும் போற்றப் படுகிறார்.இந்த குரு பூர்ணிமா தினத்தன்று , நீங்களும், தீவிர ஆன்மீக சாதனையின் மூலம், உங்களது புலன்கள் மற்றும் புத்தி, உணர்ச்சிகள் மற்றும் உணர்வுகள், எண்ணங்கள் மற்றும் எழுச்சிகளை, அடக்கி ஆள முடிவு எடுக்க வேண்டும்.