நீங்கள் பத்திரிக்கைகள், சஞ்சிகைகள் ஆகியவற்றில் போராட்டங்கள், ஆக்கிரமிப்புக்கள், வெற்றிகள் போன்றவற்றைப் பற்றிப் படிக்கிறீர்கள் ; ஆனால் இவை எல்லாம் உலகியலான வெற்றிகளே.உங்களது புலன்களின் தூண்டுதல்களுக்கு எதிராக போராடுங்கள்; உங்களது உள்ளார்ந்த எதிரிகளை வெல்லுங்கள்; உங்களது அஹங்காரத்தை வென்று வெற்றி வாகை சூடுங்கள். நீங்கள் பாராட்டுதல்கள் பெறுவதற்குத் தகுதியான வெற்றி இதுவே. ஒரு நாளை, எப்போது நீங்கள் ஆன்மீக சாதனையால் புனிதப் படுத்துகிறீர்களோ, அப்போது தான் அது தெய்வீகமானதாகிறதே அன்றி வேறு வழியில் அல்ல. ஆன்மீக சாதனை, அன்பெனும் உரம் இடப்பட்ட வயலில் மட்டுமே வளர முடியும். உலகியலான பொருட்கள், பெயர், புகழ், மனைவி மக்கள் ஆகியவற்றின் மீது நீங்கள் கொண்டுள்ள அன்பை,தெய்வத்தின் பால் கொள்ளும் அபரிமிதமான அன்பால் புனிதப் படுத்துங்கள்.இரண்டு விட்டர் பாலில், இரண்டு கரண்டி நீரை ஊற்றுங்கள்; நீர் பாலாக மதிப்பில் உயர்ந்து விடுகிறது! இப்பொழுதெல்லாம் உங்கள் ஆன்மீக சாதனையை, இரண்டு விட்டர் தண்ணீரில், இரண்டு கரண்டி பாலை விடுவதைப் போல மட்டுமே என்று தான் விவரிக்க வேண்டும் ! தெய்வத்தின் பால் கொள்ளும் அன்பு உங்கள் இதயத்தை நிரப்பி அதைப் புல்லரிக்கச் செய்யட்டும் ; பின்னர், நீங்கள் எவரையும் வெறுக்க இயலாது; தேவையற்ற போட்டிகளில் ஈடுபட இயலாது; நீங்கள் எவரிடமும் குறை காண மாட்டீர்கள். உங்கள் வாழ்க்கை இதமாகவும், இனிமையாகவும், மிருதுவாகவும் ஆகி விடும்.