துன்பப்படும் மக்களுக்கு உதவுவதை நீங்கள் சேவை என்று கருதுகிறீர்கள். இல்லை. அது அவ்வளவு எளிதானதல்ல. உங்கள் உடல் இடையறாது, மற்றவர்களுக்கு சேவை ஆற்றுவதில் ஈடுபட்டு இருக்க வேண்டும். மனித உடல் பல அவயவங்களைக் கொண்டது. அந்த அவயவங்கள் எல்லாம் உங்களது சகமனிதர்களுக்கு சேவை ஆற்றுவதில் ஈடுபட்டு இருக்க வேண்டுமே அன்றி, வேறு எதிலும் அல்ல. துரதிருஷ்ட வசமாக நாம் இந்த அடிப்படை உண்மையை மறந்து கொண்டு இருக்கிறோம். உடலில் ஒவ்வொரு அவயவமும் கர்மோபாஸனைக்காகவே (சேவையின் மூலம் இறைவனை வழிபடுதல்), இறைவனால் கொடுக்கப் பட்டுள்ளன. மனித வாழ்க்கையை, கர்மோபாஸனையால் மட்டுமே புனிதமாக்க முடியும். நாம் பல கோவில்களைக் கட்டுகிறோம். நாம் பல ஆன்மீக சாதனைகளை மேற்கொள்ளுகிறோம். ஆனால், இந்த ஆன்மீக சாதனைகள் நமக்கு தாற்காலிகமான திருப்தியைத் தருமே அன்றி, நிரந்தரமான ஆனந்தத்தை அல்ல. நமது பண்டைய கால முனிவர்கள், தங்களது முயற்சியாலேயே நிரந்தர ஆனந்தத்தைப் பெற்றுள்ளார்கள். எனவே, மனித குல சேவையைத் தவிர வேறு எதுவும் நிரந்தர ஆனந்தத்தைத் தர முடியாது என்ற உண்மையில் உறுதியான நம்பிக்கையை நீங்கள் வளர்த்துக் கொள்ள வேண்டும். துன்பதில் வாடும் மனித குலத்திற்குச் சேவை ஆற்றுங்கள்.சேவை என்றால், மருத்துவ சேவை மட்டுமே அல்ல. சக மனிதர்களுக்கு முடிந்த எல்லாவிதமான உதவிகளை அளிப்பதும் சேவையில் அடங்கும்.