பண்டிகைகளை, அவற்றின் உண்மையான முக்கியத்துவத்தைப் புரிந்து கொண்டும், அனுபவித்தும் கொண்டாடுங்கள்.இந்தத் தருணத்திலிருந்தே, தீய சிந்தனைகள் மற்றும் தீய குணங்களை விடுத்து ஒரு புது வாழ்க்கையைத் தொடங்குங்கள். உங்கள் இதயத்தை பரிசுத்தமாக்குங்கள்; உங்கள் வாழ்க்கை ஆனந்தமயமாக இருக்கும். உங்கள் இதயத்தைப் பரிசுத்தப் படுத்தாமல், புனித நூல்களைப் படிப்பதாலும், ஆன்றோரைச் சந்திப்பதாலும் பயனில்லை. உங்களது சிந்தனைகள், சொற்கள் மற்றும் செயல்கள் புனிதமானவையாக இருக்கட்டும். இதுவே புத்தாண்டைக் கொண்டாடுவதன் உண்மையான தனிச் சிறப்பாகும். நீங்கள் எந்தப் பணியையும் ஒரு புனிதமான இதயத்துடன் ஆற்றும் போது, நீங்கள் கண்டிப்பாக வெற்றி அடைவீர்கள். நீங்கள் அனைவரும் சாயியின் பக்தர்கள் என்று நம்புகிறீர்கள்; அப்படி என்றால், எனது போதனைகளைக் கண்டிப்பாகப் பின்பற்ற வேண்டும். உங்கள் வாழ்க்கைகளை அன்பினால் நிரப்புங்கள்.பிறரை விமரிசிப்பதை நிறுத்துங்கள். உங்களை வெறுப்பவர்களைக் கூட நேசியுங்கள். வெறுப்பு ஒரு தீய குணமாகும்.அது உங்களை அழித்து விடும். எனவே, இந்த தீய குணத்தை விட்டு விடுங்கள். அனைவரையும் நேசியுங்கள். நீங்கள் என் போதனைகளைப் பின்பற்றினால், நீங்கள் கண்டிப்பாக புனிதமான விளைவுகளைப் பெற்று, ஒரு நல்ல பெயர் எடுப்பீர்கள். சுயநலத்தை விடுத்து, உங்களது வாழ்க்கையை பிறரது நலனுக்காக அர்ப்பணியுங்கள்.