நமது பண்டிகைகளையும், புனித நாட்களையும், அவற்றின் உள் அர்த்தத்தைப் புரிந்து கொண்டு,சரியான உணர்வுடன் கொண்டாட வேண்டும். அசுரனான நரகாசுரனது வதம் தீமையை அழிப்பதையும், நல்லவற்றை நிலை நாட்டுவதையும் குறிக்கிறது. தீபாவளியை, நம்முள் உள்ள அனைத்து தீய குணங்களையும் விட்டொழிப்பதற்கான ஒரு நாளாகக் கொண்டாடுங்கள். நரகாசுரனால் சிறையில் அடைக்கப் பட்டிருந்த பல கோபிகைகள் பகவான் ஸ்ரீகிருஷ்ணரால் அன்று விடுவிக்கப் பட்டார்கள். நம்முள் கட்டுண்டு இருக்கும் நல்ல குணங்களை விடுவித்து, அவை பிரகாசமாக வெளிப்படச் செய்ய வேண்டும் என்பதை இது உணர்த்துகிறது. மனிதர்களிடம் அசுர குணங்கள் இருக்கும் வரை அவர்கள் இருளில் மூழ்கியே இருப்பார்கள். தீய குணங்களும், எண்ணங்களும் முழுமையாக விட்டு விடப் பட வேண்டும். இந்த உடல் மற்றும் புலனனுபவங்களின் நிலையாமையை எப்போது நீங்கள் உணருகிறீர்களோ, அப்போதே நீங்கள் வைராக்யத்தைப் பெற்று விடுவீர்கள்.உடலை , இந்த நோக்கத்திற்காக இறைவன் அளித்த ஒரு பரிசாகக் கருதி, உங்களது கடமைகளை ஆற்றுங்கள்.