இந்த சமுதாயம் என்ற ரயில் வண்டியில், இளைஞர்களாக இருப்பவர்கள், ஒரு நீண்ட பயணத்தை மேற்கொண்டே ஆக வேண்டும்.இந்த ரயில் வண்டியில் உள்ள வயதானவர்கள் வழியில் உள்ள ஸ்டேஷன்களில் இறங்கி விடுவார்கள்.எனவே, இளைஞர்கள், இந்த ரயிலில் உள்ள குறைகளை சரி செய்வதற்கான வழிகளை மேற்கொள்ளத் தயாராக இருக்க வேண்டும். உங்கள் தாய்நாட்டில் உள்ள குறைகளை சரி செய்து, உங்கள் மனதில் நல்ல மற்றும் சீரிய சிந்தனைகளை பதித்துக் கொள்ள வேண்டும்.இன்று, உங்களது பெரியவர்கள் செய்யும் ஒரு காரியம் சரியானதில்லை என்று நீங்கள் எண்ணினால், நீங்கள் வளர்ந்து பெரியவர்களாகும் போது, நீங்களும் அதையே செய்யக் கூடாது. நீங்கள் பெரியவர்களாகும் போது, உங்களது முன்னோர்கள் செய்த எந்த காரியங்கள் நல்லவை என்று இன்று நீங்கள் கருதுகிறீர்களோ, அவற்றை நீங்களும் செய்ய வேண்டும். நீங்கள் எவற்றை பாவகரமானவை என்று கருதுகிறீர்களோ அவற்றை ஒதுக்கி வைத்து விட்டு, அவற்றில் நீங்கள் ஒருபோதும் பங்கேற்கக் கூடாது. நீங்கள் கூறும் சொற்கள், நீங்கள் ஆற்றும் செயல்கள் மற்றும் உங்களுக்கு வரும் சிந்தனைகள் ஆகியவற்றில் உள்ள இசைவே, அன்றாட வாழ்க்கையில் உங்களது உண்மையான தவமாகும்.