இறை நாமஸ்மரணை, அதன் பலன்கள், அது எவ்வாறு மெதுவாக குணநலன்களை மாற்றி,நடத்தையைத் திருத்தி, உங்களைக் கனியவைத்து, உங்களை வாழ்க்கையின் குறிக்கோளுக்கு அருகாமையில் இட்டுச் செல்கிறது என்பதை எல்லாம் பற்றி நான் பல முறை கூறக் கேட்டு இருப்பீர்கள். நல்லது; இதை இரு வகையாகச் செய்யலாம்; ஒன்று, அன்றாட வாழ்க்கையின் வழக்கமான ஒரு வேலையைப் போல, இயந்திரமயமாக,குறித்த நேரத்திலும், கவனமாகவும் ருத்ராக்ஷ மாலையின் மணிகளை தானாகத் திருப்புவது, அல்லது அதை எவ்வாறு செய்ய வேண்டுமோ அவ்வாறு- அதாவது, எத்தனை தடவை என்ற இலக்கைப் பற்றி எண்ணாது, இறைவனின் திருநாமத்தைத் திரும்பத் திரும்பக் கூறி,அது குறிக்கும் திரு உருவம் மற்றும் அதன் குணாதிசியங்களை ஆழ்ந்து தியானித்து, அதை ரசித்து,அதில் திளைத்து, அந்தத் திருநாமத்துடன் இணைந்துள்ளவற்றை அனுபவித்து, அதன் இனிமையை ருசித்து, அதன் இசையில் தன்னையே மறப்பது. பசியின் வேதனைகளால் பீடிக்கப் பட்டால் மட்டுமே, நீங்கள் அந்த இறைநாமத்தின் ருசியை அனுபவிக்கத் துடிப்பீர்கள். உலகியலான காரியங்களில் அளவுக்கு மீறித் திளைத்திருப்பது என்ற அஜீரணத்தின் காரணமாக நீங்கள் பாதிக்கப் பட்டு இருந்தால், இறை நாமம் அல்லது ரூபத்தை உங்களால் ரசிக்க முடியாது.