ஒருவர், ஒரு தனிப்பட்ட துறையில் இலட்சிய மனிதராக இருக்கக் கூடும். ஆனால், எல்லாத் துறைகளிலும்- சமூக, அரசியல்,ஆன்மீக மற்றும் பொருளாதாரம் ஆகியவற்றில்- பிறருக்கு வழி காட்டக் கூடிய இலட்சிய மனிதராக, ஒருவரைக் காண்பது அரிது. நமது புராதன வரலாற்றைப் பார்த்தோமானால், பகவான் ஸ்ரீகிருஷ்ணர் அப்படிப் பட்ட ஒருவர் என நம்மால் காண முடியும். இந்த உலகனைத்திற்குமே அவரை ஒரு இலட்சிய புருஷராகக் கருதலாம். உண்மையில் நாம் ஸ்ரீகிருஷ்ணரது இந்த இலட்சியத் தன்மைகளைப் புரிந்து கொள்ள வேண்டுமானால், ஒரளவு, நாம் அவருள் பொதிந்திருக்கும் தெய்வீக அம்சங்களை ஒதுக்கி வைத்து விட்டு, அவரது வாழ்க்கை மற்றும் பணியில் இருக்கும் மனித அம்சங்களைக் கவனிக்க வேண்டும். நாம் அவரது தெய்வீக அம்சங்களில் கவனம் செலுத்தும் வரை, அவரது நல்ல மனித குணங்களின் சரியான கண்ணோட்டம் நமது கவனத்திற்கு வர மாட்டா. இன்று மக்கள் மனிதனை வழிபடத் தயாராக இருக்கிறார்கள்; ஆனால் மனிதனைப் புரிந்து கொள்ளத் தயாராக இல்லை. மனித இயல்பின் வழியாக முயன்றால் மட்டும் தான், மனிதர்களில் உள்ள தெய்வீகத்தின் வலிமை எப்படிப் பட்டது என்பதை நாம் புரிந்து கொள்ள முடியும்.