புலனின்பங்களின் ஆதிக்கத்தில் ஒருவர் இருக்கும் வரை, அவரது ஆன்மீகப் பயணம் துவங்கி விட்டதாகக் கூற முடியாது.தற்போது பலர் ஆன்மீக ஆனந்தத்தின் அனுபவத்திற்காக ஏங்குகிறார்கள், ஆனால் சிலரே அதைப் பெறுகிறார்கள்; ஏனெனில், அவர்கள் புலன்களின் ஆரவாரத்தை நிராகரிக்க முடியாத பலவீனர்களாக தாங்கள் இருப்பதைக் காண்கிறார்கள் ! சிறிது ஆராய்ந்து பார்த்தால், புலன்கள் கெட்ட எஜமானர்கள் என்பது புலப்படும்; அவை தரும் இன்பம் தாற்காலிகமானதும்,துன்பம் நிறைந்ததும் ஆகும். இறைவன் பால் நீங்கள் கொண்டுள்ள பக்தியின் சிறந்த வெளிப்பாடு புலனடக்கத்தைப் பெறுவதே. ஏனெனில், புலன்கள் தாற்காலிகமான மற்றும் தரம் கெட்டவற்றை நோக்கித் தறிகெட்டு ஓடுகின்றன; இவ்வாறு அவை இதயத்தைக் கெடுக்கின்றன. நான் உங்கள் ஒவ்வொருவரிடமிருந்து வேண்டுவது, நான் உங்களுக்கு அளித்த இதயத்தைத் தவிர வேறு மதிப்பு வாய்ந்த எதையுமல்ல ! நான் உங்களுக்குக் கொடுத்த போது எவ்வளவு தூய்மையாக இருந்ததோ, அவ்வளவு தூய்மையான இதயத்தை, தன்னலமற்ற அன்பு என்ற அமுதத்தால் நிரப்பி எனக்குத் தாருங்கள் ! உங்கள் அனைத்து சிந்தனைகள், சொற்கள் மற்றும் செயல்களை, ‘’ இதை இறைவன் அங்கீகரிப்பானா? இது அவனுக்கு புகழைச் சேர்க்குமா?’’ என்ற உரைகல்லில் பரிசோதித்துப் பாருங்கள்.