ஒரு முறை புகழ் பெற்ற இத்தாலியச் சிற்பியான மைக்கேல் ஏஞ்சலோவின் நண்பர் ஒருவர் அவரிடம்,’’இந்தப் பெரிய பாறையைச் செதுக்குவதில் ஏன் இவ்வளவு கடினமாக உழைத்துக் கொண்டு இருக்கிறாய்? வீட்டிற்குச் சென்று, கொஞ்சம் ஓய்வு எடுத்துக் கொள்ளக் கூடாதா?’’ என்று கேட்டார். மைக்கேல் ஏஞ்சலோ அதற்கு,’’நான் இந்த உயிரற்ற கல்லில் பொதிந்திருக்கும் உயிரோட்டம் கொண்ட தெய்வீகத்தை வெளியில் கொண்டு வர விரும்புகிறேன்.’’ என பதிலளித்தாராம். ஒரு சிற்பி ,உயிரற்ற ஒரு கல்லில் இருந்து ஒரு உயிரோட்டம் கொண்ட இறைவனது சிலையைப் படைக்க முடியும் என்றால்,உயிர்த்துடிப்பைக் கொண்ட மனிதர்களால், அவர்களுள் உறையும் தெய்வீகத்தை வெளிக் கொணர முடியாதா? உங்களது உடைகள் அழுக்கடைந்து விட்டால், அதை மாற்றிக் கொள்கிறீர்கள்; ஏனென்றால், அழுக்கான உடையணிந்து வருவது உங்களுக்கு அவமானமாக இருக்கிறது. உங்களது வீடு அசுத்தமாக இருந்தால், அதை நீங்கள் தூய்மைப் படுத்துகிறீர்கள்; ஏனெனில் வரும் விருந்தினர்களுக்கு உங்களைப் பற்றி ஒரு கெட்ட அபிப்பிராயம் வரக் கூடாது என்பதால். ஆனால் உங்களது மனங்களும் ,இதயங்களும் மாசடையும் போது , நீங்கள் அவமானப் படுவதில்லை. உங்களது உடைகள் மற்றும் இல்லங்களின் தூய்மையைப் பற்றி இவ்வளவு அக்கறை எடுத்துக் கொள்ளும் நீங்கள், உங்கள் வாழ்க்கை முழுவதையும் பாதிக்கும் இதய மற்றும் மனத்தூய்மையைப் பற்றி அக்கறை கொள்ளாதது விசித்திரமாக இல்லையா?