பலர் மானிட சேவையே ( மானவ சேவா),மகேசன் சேவை ( மாதவ சேவா) என்று கூறுவார்கள். இது உண்மையே. மனித குலத்திற்கான சேவை புனிதமானது தான் என்றாலும், ஒவ்வொருவர் உள்ளும் தெய்வீகம் உறைகிறது என்ற உயர்ந்த இலட்சியத்துடன் ஒன்றரக் கலக்கவில்லை என்றால், அது எவ்வளவு பெரிய சேவையாக இருந்த போதும் கூட, மனிதர்கள் அதனால் பலனடைய மாட்டார்கள். பெயர்,புகழ் மற்றும் ஒருவரது செயலின் பலன்களின் மீதான கண்ணோட்டத்துடன் சேவை ஆற்றப் படுமானால், கோஷங்களை முழக்குவது பயனற்றதே. இறைவனை சதாஸர்வ காலமும் தியானித்துக் கொண்டும், செயலாற்றுவதில் உண்மையான மற்றும் தார்மீகமான முறைகளை அனுசரித்தும், மனிதர்களின் இன்றியமையாத தெய்வீகத்தில் நம்பிக்கை வைத்துப் பணியாற்றியும் செய்தால் மட்டுமே, மனித குலத்திற்கு ஆற்றப் படும் சேவை உண்மையிலேயே இறைவனுக்கு ஆற்றப் படும் சேவையாகி விடும். இறைவனைப் பற்றிய எண்ணங்கள் இன்றி , இறைவனுக்கு சேவை ஆற்றுவது என்பது எங்கிருந்து வரும்? இப்படிப் பட்ட பேச்சு அனைத்தும் வெறும் படாடோபமே. உண்மையில் இறை தியானத்தில் இடையறாது திளைத்திருப்பவர்கள் வேறு எந்த சேவையும் செய்யத் தேவையே இல்லை. அவர்களது பிரார்த்தனையின் பலனே இந்த உலகைப் புனிதமாக்கி விட முடியும். ஆனால் ,அனைவரும் இவ்வாறு ஈடுபட்டு இருக்க முடியாது ;எனவே, மற்றவர்கள், தங்கள் மனதைத் தூய்மைப் படுத்திக் கொண்டும், ஆசைகளைக் குறைத்துக் கொண்டும், அந்த நிலையை அடைவதற்கு தங்களைத் தயாராக்கிக் கொள்ள வேண்டும்.