இறைவன் அவ்வப்போது,தாழ்த்தப் பட்டவர்களை உயர்த்தவும், தர்மத்தை நிலை நாட்டவும் அவதாரம் எடுத்து இற(ர)ங்கி வருகிறான்.இந்த உண்மையைத் தெளிவாகப் புரிந்து கொள்ளுங்கள்.ஸ்ரீமத் பகவத் கீதையைப் படித்த பலர் தர்மம் எப்போது அழிக்கப் பட்டு, அதர்மப் படைகளின் கை ஓங்கத் தொடங்குகிறதோ, அப்போது இறைவன் அவதாரம் எடுத்து வருகிறான் என எடுத்துக் கொள்கிறார்கள். இது தவறு. ஸ்ரீமத் பகவத் கீதை அவ்வாறு கூறவும் இல்லை; தர்மம் அழிந்து விடுகிறது என்ற முடிவுக்கு வருவதற்கு எந்த விதமான ஆதாரமும் இல்லை. இங்கு பயன்படுத்தப் பட்ட வார்த்தை '' மங்குகிறது '' (க்லானி), அதாவது தர்மம் ஆபத்தில் இருக்கிறது என்ற அறிகுறிகள் தென்படும் போது என்று பொருள். '' இறைவன் தர்மம் பாதிக்கப் படுவதிலிருந்து காப்பாற்ற வருகிறான்''. பகவான் ஸ்ரீகிருஷ்ணர், தர்மம் அழிக்கப் பட்ட பிறகு அதைப் பேணிக் காக்க இறங்கி வருவதாகக் கூறவில்லை ! உயிர் போன பிறகு ஒரு மருத்துவர் வந்து என்ன பயன்?அதைப் போலவே, தர்மத்தைக் கடைப்பிடிப்பது குறையும்போது அல்லது பலஹீனம் அடையும் போது, இறைவன் ஓடி வருகிறான். தர்மம் என்பது ஒவ்வொரு ஜீவனின் உயிர் மூச்சு என்பதால், அதைக் காப்பது இறைவனது பணியாகிறது.