தொடரும் ஒவ்வொரு நாளின் இடையறாத உழைப்பின் குறிக்கோளும், காரணமும் இந்த ஒன்று தான்:ஒருவரது இறுதி நாட்களை இனிமையாகவும்,இதமாகவும் ஆக்க வேண்டும். ஆனால் ஒவ்வொரு நாளைக்கும் அதனது மாலைப் பொழுது இருக்கிறது.நாட்பொழுதெல்லாம் நற்செயல்களில் கழிக்கப் பட்டால்,பின்னர் மாலைப் பொழுது, சமாதியை ஒத்தது எனப் போற்றப் படும் ஆழ்ந்த,புத்துணர்ச்சியூட்டும் தூக்கத்தைத் தருகிறது. ஒருவருக்கு இந்த உலகில் குறுகிய காலமே வாழ்க்கை உள்ளது. ஆனால் இந்தக் குறுகிய காலத்திலும், ஒருவர், நேரத்தை புத்திசாலித்தனமாகவும் , கவனத்துடனும் செலவழிப்பதன் மூலம் தெய்வீகப் பேரானந்தத்தைப் பெற முடியும். இரண்டு மனிதர்கள் ஒரே போல, ஏன் ஒரே அச்சில் வார்க்கப் பட்டவர்களைப் போலவும், ஒரே விதமான சூழ்நிலைகளில் வளர்க்கப்பட்டு இருந்தாலும் கூட அதில் ஒருவர் தேவதையைப் போல இருந்து, மற்றவர் அவரது மிருக இயல்பிலேயே தங்கி விடுபவராக இருக்கக் கூடும். இப்படி மாறுபட்ட வளர்ச்சிக்குக் காரணம் என்ன?அதுவே பழக்கங்கள், இந்தப் பழக்கங்களிலிருந்து உருவான நடத்தை, மேலும் இந்த நடத்தையின் மூலம் நிலை கொண்டு விட்ட குண நலன்கள். மனிதர்கள் குணநலன்களால் ஆன ஜீவன்கள்.எனவே,முதன் முதலில் செய்ய வேண்டிய ஆன்மீக சாதனை, உங்களுள் உள்ள குற்றம் ,குறைகளைத் தேடிக் கண்டு பிடித்து, அவற்றை சரி செய்து, அப்பழுக்கற்றவர்களாக ஆவதற்குப் பாடுபடுவதே ஆகும்.