உங்களது வாழ்க்கையின் ஒவ்வொரு தருணத்திலும்,இயற்கையில் உள்ள ஒவ்வொரு பொருளும், உங்களைச் சுற்றி உள்ள ஒவ்வொருவரும், இடையறாது உங்களுக்கு பல விதமான பாடங்களைக் கற்றுக் கொடுத்துக் கொண்டே இருக்கின்றனர்.இந்த சத்தியத்தை உணர்ந்திருங்கள்.இயற்கை அற்புதமானது, புனிதமானது மற்றும் அழகானது. அன்றாட வாழ்க்கையின் பிரச்சனைகளில் ஆழ்ந்துள்ள மனிதர்கள் தங்களது பித்துப் பிடித்த அகந்தையின் காரணமாக தங்களை இயற்கையின் எஜமானர்கள் என்று கருதுகிறார்கள். இயற்கையே உங்களது வாழ்க்கையின் ஒவ்வொரு அம்சத்திற்கும் தலைமை தாங்கி, உங்களுக்கு அனைத்து போஷாக்கையும் அளிக்கிறது.அது உங்களை ஆசீர்வதிக்கவோ அல்லது தண்டிக்கவோ முடியும்; அதன் ஆதிக்கம் விசாலமானது.இறைவன் படைப்பின் அனைத்தையும் சமமாகவே கருதிறான்;அவன் அனைத்திலும் உறைகிறான். எனவே, இயற்கையையும் ,இறைவனையும் வெவ்வேறானவை எனக் கருதாதீர்கள். பொருளும் அதன் பிம்பமும் போல அவை ஒன்றுக்கொன்று இணைபிரியாத சம்பந்தம் கொண்டவை. பண்டைய இந்திய மறைநூல்கள் இயற்கையில் உள்ள ஒவ்வொரு பொருளையும் தெய்வீகத்தின் உருவாகக் கருதி வழி பட்டன. கல்லிருந்து வைரம் வரை,எறும்பிலிருந்து யானை வரை,சாதாரண மனிதனிலிருந்து துறவி வரை, ஒவ்வொன்றும், ஒவ்வொரு ஜீவராசியும் வழிபாட்டிற்கு உகந்ததாகக் கருதப் பட்டது.