ஒவ்வொருவரும் குழந்தை பரீக்ஷித்து பகவானின் மடியைத் தேடிய அற்புதமான விதத்தைப் பாராட்டி,அப்போதே அவர் பெற்றிருந்த நிலையான நம்பிக்கையைப் புகழ்ந்தார்கள்.யுதிஷ்டிரர் அந்தக் குழந்தையின் செயலைக் கண்டுக் குழப்பம் அடைந்து, வ்யாச மகரிஷியை அதற்கான விளக்கத்தை அளிக்குமாறு வேண்டினார். வ்யாசர் ,'' யுதிக்ஷ்டிரா!இந்தக் குழந்தை தாயின் கர்ப்பத்தில் இருக்கும் போது, அதை அழிப்பதற்காக அஸ்வத்தாமன் ஏவிய கொடிய பாணம் அதன் இலக்கை நெருங்கிக் கொண்டு இருந்தது.பகவான் ஸ்ரீகிருஷ்ணர் அப்போது அந்த கர்ப்பா ஸ்தானத்தில் புகுந்து அதை அழிவிலிருந்து காப்பாற்றினார்.இந்தக் குழந்தை, கர்ப்பதிலேயே தன்னைக் காப்பாற்றியவர் யார் என்பதைத் தெரிந்து கொள்ள ஆவலாக இருந்தது. அவன் சிசுவாகத் தான் கர்ப்பத்தில் இருந்த போது கண்ட அதே காந்தியுடன் யார் இருக்கிறார் என்று ஒவ்வொருவரையும் சோதித்துப் பார்க்க ஆரம்பித்தது. இன்று, முழுமையான ப்ரகாசத்துடன்,அதே தெய்வீக ரூபத்தைக் கண்டவுடன், நேராக அவரிடம் சென்று, அவரது மடியில் உட்கார வேண்டும் என்று பிரார்த்தித்தது. பகவானும் அவனது பிரார்த்தனைக்கு இணங்கினார்'' என்று விளக்கம் அளித்தார். யுதிஷ்டிரர் இதைக் கேட்டு,இறைவனது அளவற்ற கருணையைக் கண்டு நன்றியுணர்வுடன் ஆனந்தக் கண்ணீர் சிந்தினார்.