உண்மையான இறை அனுபவத்தின் சுகத்தை உணர்ந்த ஒரு சொற்பொழிவாளரது வர்ணனைகளைக் கேட்பது என்பது ஒரு ஆசீர்வாதமே. அவர்களது வதனம் சந்தோஷத்தால் மலர்ந்து இருக்கும்; இறைவனது மஹத்துவத்தைப் பற்றிச் சிந்தித்த உடனேயே அவர்களது கண்கள் ஆனந்தக் கண்ணீரைச் சொரியும். கேட்பவர்களும், எளிதாக அந்த உத்வேகத்தைப் பற்றிக் கொண்டு, அவர்களது கண்களிலும் கண்ணீர் பெருகி, அதே ஆனந்தத்தை தாங்களாகவே அனுபவிப்பார்கள். ஒரு பச்சிளங்குழந்தை புன்னகைக்கும் போது,அதைச் சுற்றி உள்ள அனைவரும் ஒன்றுபோல இணைந்து புன்முறுவல் பூப்பார்கள்.அதைப் போலவே, இறைவன் பால் கொண்ட பக்தியில் திளைப்பவர்களது வார்த்தைகள், கேட்பவரது இதயங்களையும் அவ்வாறே திளைக்க வைக்கும். இந்த ஸ்ரவணத்தின் ( கேட்கும் முறை) மூலம் ஒரு மாசு படிந்த இதயம்,உண்மையான காந்தி மற்றும் ப்ரேமையால் பிரகாசிக்கும், ஒரு தூய்மையான மற்றும் ஒளிர்விடும் இதயமாக மாறி விடும். புலனின்பத் தேடுதல்கள் என்ற துர்நாற்றத்திற்கு, இறைவனின் மஹத்துவங்களைக் கேட்பதில் கொள்ளும் ஆர்வம் என்பது, அதுவே ஒரு இனிமையான நறுமணம் கொண்டதாக இருப்பதோடு மட்டும் அல்லாது, ஒரு விலைமதிப்பற்ற கிருமிநாசினி போன்றதும் ஆகும். இந்த ஸ்ரவணம் ( கேட்பது), உங்கள் இதயத்தை திறம்படத் தூய்மையாக்கி விடும்.