இந்நாளில் மக்கள், இறைவன் தங்களை மறந்து விட்டான் என்று பேசுகிறார்கள். இது உண்மையல்ல.பெரும்பாலும், பக்தன் தான் பகவானை விட்டு விடுகிறான்.பக்தன் தான் பகவானை மறந்து விடுகிறான். அவர்களது உணர்வுகளே, அவர்களது வார்த்தைகளில் பிரதிபலிக்கின்றன. மனிதர்கள் இறைவனை மறந்து விட்டு,உலக வாழ்க்கையில் மூழ்கி விட்டு,திடீரென்று ஒரு நாள், இறைவன் அவர்களை மறந்து, கைவிட்டு விட்டான் என்று புலம்புகிறார்கள். இறைவனிடமிருந்து பிரிந்து இருப்பது தான் மனிதர்கள் புலனிம்பங்களில் புதைந்து கிடப்பதற்கான முழு முதற்காரணம்.மனமே ஒருவரது சுக, துக்கங்களுக்குக் காரணம். சுக, துக்கங்களிலிருந்து விடுதலை பெறுவதற்கு, மனதை இறைவன் பால் செலுத்தியே ஆக வேண்டும். நீங்கள் இறைவனிடமிருந்து வழி தவறிச் சென்று விட்டு, இறைவன் உங்களை விட்டுச் சென்று விட்டான் என்று நினைக்கிறீர்கள்.இறைவன் பக்தனை ஒருபோதும் மறக்க மாட்டான், மறக்க முடியாது.இறைவன் உங்களை விட்டு ஒருபோதும் செல்வதில்லை.அவன் உங்களுடன் எப்போதும் இருந்து, உங்களை அரவணைத்து,நீங்கள் அவனிடம் திரும்பி வருவதை எதிர்பார்த்துக் காத்திருக்கிறான்.