ஸ்ரீமத் பகவத் கீதை அல்லது பிற சாஸ்திர நூல்களில் உள்ள சில கூற்றுக்கள் ஒன்றுக்கொன்று முரணாகத் தோன்றலாம்.உதாரணமாக ஸ்ரீமத் பகவத் கீதையில் பகவான் ஸ்ரீகிருஷ்ணர்,ஒரு இடத்தில் கர்மாவின் அவசியத்தையும், இன்னொன்றில், தர்மத்தைக் கடைப்பிடிப்பதையும் வலியுறுத்துகிறார்; இன்னும் ஓர் இடத்தில் அனைத்து தர்மங்களையும் தியாகம் செய்து விட்டு இறைவனிடம் பரிபூரண சரணாகதியடைய வேண்டும் என அறிவுறுத்துகிறார். முரண்பாடுகள் போலத் தோன்றும் இவை, முரண்பாடுகளே அல்ல. இந்த போதனைகள், குறிப்பிட்ட நபரின் ஆன்மீக முன்னேற்றத்தின் பல்வேறு நிலையையும், அவர் இருக்கும் சந்தர்ப்ப சூழ்நிலைகளையும் பொறுத்து மாறுபட்டு இருக்கும். அவதாரங்கள் மற்றும் முனிவர்களின் தலை சிறந்த போதனைகளை விமரிசிக்க முற்படுவதற்கு முன்பு,அவற்றின் உள்ளார்ந்த முக்கியத்துவத்தை முழுமையாகப் புரிந்து கொள்வதில், ஒருவர்,தேவையான கவனமும், கருத்தும் செலுத்த வேண்டும் என்பதே இங்கு நமக்கான பாடமாகும்.