பிரார்த்தனை மதத்தின் உயிர் மூச்சாகும்; ஏனெனில்,அதுவே மனிதனையும், இறைவனையும் ஒருவருக்கு ஒருவர் மிக அருகில் கொண்டு வருகிறது. ஸ்ரீகிருஷ்ணனின் தெய்வீகப் புல்லாங்குழல் கீதத்தை, மனச்செவிகள்,அதன் இசை மீது கவனம் வைத்துக் கேட்கச் செய்யும் முறையே தியானமாகும். எவ்வாறு நீங்கள் ஒவ்வொரு நாளும்,எரிசக்தி மற்றும் வைடமின்களின் அளவைக் கணக்கிட்டு,உணவின் சத்துக்களைப் பற்றி நுண்ணிய கவனம் செலுத்தி, உடற்பயிற்சி செய்வது மற்றும் ஊட்ட மருந்துகளை உட் கொள்வதைச் செய்கிறீர்களோ,அவ்வாறே மனதில் ஏற்படும் உணர்வுகளைப் பற்றியும், - அதாவது, அவை மனத்திண்மையை குலைக்கின்றனவா அல்லது அதிகரிக்கின்றனவா, விஷக் கிருமிகளான பேராசை, பொறாமை, வெறுப்பு, தற்பெருமை, வன்மம் போன்றவற்றை எதிர்ப்பதற்கு மனதின் திறனைக் கூட்டுகின்றனவா போன்றவை- கவனம் செலுத்த வேண்டும்.நற்செயல்களான சேவை மற்றும் தெய்வீக எண்ணங்கள் அடங்கிய உணவை உட்கொண்டு, ப்ரேமையின் ரசத்தை அருந்துங்கள்;அது அந்த உணவுடன் கலந்து உட்சென்று, நன்கு ஜீரணமாகட்டும்.பின்னர், நீங்கள் மன ஆரோக்யம், மகிழ்ச்சி மற்றும் பூரணத்துவத்துடன் ஒளி விட்டுத் திகழ முடியும்.