மனதிலிருந்து அழுக்கை நீக்குவதே ஸம்ஸ்காரத்தின் முதல் படி. பொறாமையே அதிகமாக ஒட்டிக் கொள்ளும் அழுக்கு என்பதைத் தெரிந்து கொள்ளுங்கள். உங்களைச் சுற்றி உள்ள சக மனிதர்கள் சந்தோஷமாக இருந்தால், நீங்களும் சந்தோஷப் பட வேண்டும். அதுவே உண்மையான பரீக்ஷை. ஸ்ரீராமர் , தன்னைச் சுற்றி இருந்தவர்களுக்கு சந்தோஷமான நிகழ்ச்சிகள் நடைபெற்ற போது, தனக்கே அவை நிகழ்ந்தது போல சந்தோஷப் பட்டார் என ஸ்ரீமத் ராமாயணம் கூறுகிறது. ஸ்ரீகிருஷ்ணர், அர்ஜூனனை '' அன் அஸூயா '', அதாவது பொறாமை அற்றவன் என வர்ணிக்கிறார். பகவானிடமிருந்தே கிடைக்கும் எவ்வளவு தலைசிறந்த பாராட்டு இது! அதனால் தான் பகவான் ஸ்ரீகிருஷ்ணர், அர்ஜூனனுக்கே ஆன்மீக சாதனைகளின் ரகசியங்களை கற்பித்தார்.இறைவன் மீது ஆழ்ந்த ப்ரேமை வையுங்கள். ஆனால், மற்றவர்களும் அவனை நேசித்து அல்லது அவனது கவனத்தை ஈர்த்து, அவனிடம் பற்று வைக்கும் போது, பொறாமை கொண்டு மன அழுத்தத்திற்கு ஆளாகாதீர்கள். பொறாமை இன்றி ,அன்பு செலுத்துவதில் எப்போதும் கவனமாக இருங்கள்.