நான் சொல்வதைக் கேளுங்கள், நீங்கள் அனைவரும் தெய்வீகமானவர்களே ! நீங்கள் அனைவரும் இங்கு ஒரு புனித நோக்கத்துடன், தெய்வீகக் காரணங்களுக்காக வந்திருக்கிறீர்கள். உங்களை பலஹீனர்களாகவோ, பாவிகளாகவோ கருதுவதே பாவம் ! உங்களது பிறப்புரிமையான சாந்தியை நீங்கள் கண்டிப்பாகப் பெற்றே ஆக வேண்டும். சாந்தியின்றி இருக்கும் நிலை செயற்கையானது.இந்தப் பரம்பரைச் சொத்தான சாந்தியைப் பெற, மனிதர்கள் பல முறைகளைக் கையாளுகிறார்கள் - செல்வத்தைக் குவிப்பது,உடலை ஆரோக்யமாக வைத்துக் கொள்வது, அறிவு கூர்மையைப் பெறுவது, கலைகளை வளர்த்துக் கொள்வது எனப் பலப் பல. இவை அனைத்தும் அடிப்படையானவை அல்ல.இந்த அனைத்து முறைகளையும் கையாண்ட பிறகும் மூன்று அடிப்படைத் தேவைகள் பூர்த்தி ஆகாமல் இருக்கின்றன - சத்தியம்,ஞானம் மற்றும் அமரத்துவம் ஆகியவற்றின் தேவைகள். இவற்றை வென்றால் தான் நிலையான சாந்தியைப் பெற முடியும்.